എലിസബത്ത് രാജ്ഞിക്ക് അന്തിമോപചാരം അർപ്പിക്കാൻ ഡേവിഡ് ബെക്കാം വരിനിന്നത് 13 മണിക്കൂർ

ലണ്ടന്‍: അന്തരിച്ച എലിസബത്ത് രാജ്ഞിക്ക് അന്തിമോപചാരം അര്‍പ്പിക്കാനും അവരുടെ ശവമഞ്ചം കാണാനും വേണ്ടി മുന്‍ ഇംഗ്ലണ്ട് ഫുട്‌ബോള്‍ ടീം ക്യാപ്റ്റന്‍ ഡേവിഡ് ബെക്കാം വരിനിന്നത് 13 മണിക്കൂറിലേറെ സമയത്തോളം. വെള്ളിയാഴ്ചയായിരുന്നു ആയിരങ്ങളോടൊപ്പം ബെക്കാം രാജ്ഞിക്ക് അന്തിമോപചാരമര്‍പ്പിക്കാന്‍ കാത്തുനിന്നത്. യുകെ പാര്‍ലമെന്റിന്റെ ഭാഗമായുള്ള വെസ്റ്റ്മിന്‍സ്റ്റര്‍ ഹാളിലാണ് എലിസബത്ത് രാജ്ഞിയുടെ ഭൗതികദേഹം പൊതുദര്‍ശനത്തിന് വെച്ചത്. ഇന്ത്യന്‍ സമയം പുലര്‍ച്ചെ 2.15-ന് വരിനില്‍ക്കാന്‍ തുടങ്ങിയ ബെക്കാമിന് ഉച്ചതിരിഞ്ഞ് 3.25-ഓടെയാണ് രാജ്ഞിക്ക് അന്തിമോപചാരമര്‍പ്പിക്കാനായത്. റോയിട്ടേഴ്‌സിന് നല്‍കിയ അഭിമുഖത്തില്‍ ബെക്കാം തന്നെയാണ് ഇക്കാര്യം വ്യക്തമാക്കിയത്. തിരക്ക് വര്‍ധിച്ചതോടെ വെള്ളിയാഴ്ച അധികൃതര്‍ക്ക് വെസ്റ്റ്മിന്‍സ്റ്റര്‍ ഹാളിലേക്കുള്ള ആളുകളുടെ പ്രവേശനം താല്‍ക്കാലികമായി നിര്‍ത്തിവെയ്‌ക്കേണ്ടിവന്നിരുന്നു. 14 മണിക്കൂറോളം കാത്തുനിന്നാണ് പലരും രാജ്ഞിക്ക് അന്തിമോപചാരമര്‍പ്പിച്ചത്. പാര്‍ലമെന്റിന്റെ വെസ്റ്റ്മിന്‍സ്റ്റര്‍ ഹാളില്‍ നിന്നും മധ്യ ലണ്ടനിലൂടെ ആളുകളുടെ നിര കിലോമീറ്ററുകളോളം നീണ്ടിരുന്നു. തിങ്കളാഴ്ചയ്ക്ക് മുമ്പ് 7,50000-ഓളം ആളുകള്‍ രാജ്ഞിക്ക് അന്തിമോപചാരം അര്‍പ്പിക്കുമെന്നാണ് പ്രതീക്ഷിക്കുന്നത്.