തദ്ദേശ സ്ഥാപനങ്ങള്‍ക്ക് 1017 കോടി അനുവദിച്ചു; ഈ വര്‍ഷം നല്‍കിയത് 7258 കോടി

തിരുവനന്തപുരം വികസനത്തിന് വേഗം പകര്‍ന്ന് തദ്ദേശ സ്വയംഭരണ സ്ഥാപനങ്ങള്‍ക്ക് പദ്ധതി വിഹിതമായി 1017 കോടി രൂപകൂടി സര്‍ക്കാര്‍ അനുവദിച്ചു. പഞ്ചായത്തുകള്‍ക്ക് 519 കോടി, ബ്ലോക്ക് പഞ്ചായത്തുകള്‍ക്ക് 36 കോടി, ജില്ലാ പഞ്ചായത്തുകള്‍ക്ക് 262 കോടി, മുനിസിപ്പാലിറ്റികള്‍ക്ക് 103 കോടി, കോര്‍പറേഷനുകള്‍ക്ക് 97 കോടി എന്നിങ്ങനെ ലഭിക്കും. ഇതോടെ സംരക്ഷണ ഫണ്ടിനത്തില്‍ ബജറ്റില്‍ സര്‍ക്കാര്‍ പ്രഖ്യാപിച്ച 3006 കോടി രൂപയും കൈമാറി. തദ്ദേശ സ്ഥാപനങ്ങള്‍ക്കു കീഴിലെ റോഡിനും കൈമാറി കിട്ടിയ സ്‌കൂളുകള്‍, ആശുപത്രികള്‍, അങ്കണവാടികള്‍ ഉള്‍പ്പെടെ സ്ഥാപനങ്ങളുടെ ആസ്തി പുനരുദ്ധാരണത്തിനും അറ്റകുറ്റപ്പണികള്‍ക്കുമായാണ് ഫണ്ട്. ഈ വര്‍ഷം ബജറ്റില്‍ പ്രാദേശിക സര്‍ക്കാരുകള്‍ക്ക് വിവിധ ഇനങ്ങളിലായി നീക്കിവച്ച 12,903 കോടിയില്‍ 7258 കോടിയും കൈമാറി. പൊതുആവശ്യ ഫണ്ടായി 926 കോടിയും സംസ്ഥാന പദ്ധതിയുടെ വിഹിതമായ വികസന ഫണ്ടിനത്തില്‍ 1877 കോടിയും നല്‍കി. ധനകമീഷന്‍ ശുപാര്‍ശയിലെ ഉപാധിരഹിത ഗ്രാന്റായി 325 കോടിയും പത്തുലക്ഷത്തിനുമേല്‍ ജനസംഖ്യയുള്ള നഗരസഭകള്‍ക്കുള്‍പ്പെടെ അനുവദിക്കുന്ന ഉപാധി അധിഷ്ഠിത ഗ്രാന്റായ 1124 കോടിയും കൈമാറി. സാമ്പത്തിക വര്‍ഷത്തിന്റെ പകുതിക്കുമുമ്പേ പഞ്ചായത്തുകള്‍ക്ക് 4021 കോടിയും ബ്ലോക്കു പഞ്ചായത്തുകള്‍ക്ക് 540 കോടിയും ജില്ലാ പഞ്ചായത്തുകള്‍ക്ക് 1044 കോടിയും മുനിസിപ്പാലിറ്റികള്‍ക്ക് 796 കോടിയും കോര്‍പറേഷനുകള്‍ക്ക് 857 കോടിയും നല്‍കി. ആറാം സംസ്ഥാന ധന കമീഷന്‍ ശുപാര്‍ശപ്രകാരമായിരുന്നു ഈ വര്‍ഷത്തെ പ്രാദേശിക സര്‍ക്കാരുകളുടെ റോഡ്, റോഡിതര സംരക്ഷണ ഫണ്ട് വിഭജിച്ച് ബജറ്റ് വിഹിതത്തില്‍ ഉള്‍ക്കൊള്ളിച്ചത്. എന്നാല്‍, മുന്‍വര്‍ഷത്തെ അപേക്ഷിച്ച് ഫണ്ടില്‍ കുറവുള്ളതായി തദ്ദേശ സ്ഥാപനങ്ങള്‍ പരാതി ഉയര്‍ത്തി. തുടര്‍ന്ന് 2020--21ലെ അനുപാതത്തില്‍ പുനക്രമീകരിച്ചാണ് ഫണ്ട് വിതരണം. ധന കമീഷന്‍ ശുപാര്‍ശ അടുത്തവര്‍ഷം നടപ്പാക്കും.