രണ്ടാംഭാര്യയെ ജീവനോടെ പെട്രോളൊഴിച്ച് കത്തിച്ചു, തെളിവുനശിപ്പിക്കാൻ ചാരം കടലിലൊഴുക്കി, അറസ്റ്റ്‌

മുംബൈ: രണ്ടാംഭാര്യയെ കത്തിച്ച് ചാരം കടലിലൊഴുക്കിയ ശിവസേനാനേതാവ് അറസ്റ്റില്‍. 47 കാരനായ ഭായ് സാവന്ത് എന്നുവിളിക്കുന്ന സുകാന്ത് സാവന്താണ് ഭാര്യയെ കൊന്നകേസില്‍ അറസ്റ്റിലായത്. രത്‌നഗിരി പഞ്ചായത്ത് സമിതിയുടെ മുന്‍ പ്രസിഡന്റായ സ്വപ്നാലി(35)യെയാണ് സുകാന്തും കൂട്ടാളികളും ചേര്‍ന്ന് ജീവനോടെ തീക്കൊളുത്തി കൊന്നത്. സുകാന്തിനുപുറമേ ഇയാളുടെ സഹായികളായ റുപേഷ് (ഛോട്ടാ സാവന്ത്-43), പ്രമോദ് (പമ്യ ഗവ്നാംഗ്-33) എന്നിവരെയും പോലീസ് പിടികൂടി. തെളിവുകള്‍ നശിപ്പിക്കാനായി ഇയാള്‍ മൃതദേഹംകത്തിച്ച് ചാരം കടലില്‍ ഒഴുക്കുകയായിരുന്നു. കൊലപാതകം, ക്രിമിനല്‍ ഗൂഢാലോചന, തെളിവുനശിപ്പിക്കല്‍ എന്നീ കുറ്റങ്ങള്‍ ചുമത്തിയാണ് അറസ്റ്റ്. കോടതി മൂവരെയും സെപ്റ്റംബര്‍ 19-വരെ പോലീസ് കസ്റ്റഡിയില്‍ വിട്ടു. കുടുംബവഴക്കിനെത്തുടര്‍ന്നാണ് സ്വപ്നാലിയെ കൊലപ്പെടുത്തിയത്. മൂവരുംചേര്‍ന്ന് ഓഗസ്റ്റ് 31-ന് ഗണേശചതുര്‍ഥിദിവസം സ്വപ്നാലിയെ ജീവനോടെ പെട്രോളൊഴിച്ച് കത്തിച്ചു. സുകാന്തിന്റെ സ്ഥലത്തിട്ടാണ് കത്തിച്ചത്. തുടര്‍ന്ന് ചാരം കടലിലൊഴുക്കിയെന്നും രത്‌നഗിരി എസ്.പി. മോഹിത് കുമാര്‍ ഗാര്‍ഗ് പറഞ്ഞു. കൊലപാതകം നടന്ന സ്ഥലത്തുനിന്ന് ലഭിച്ച സാമ്പിളുകള്‍ പരിശോധനയ്ക്കയക്കുമെന്നും അദ്ദേഹം വ്യക്തമാക്കി. കൊലപാതകത്തിനുശേഷം ഭാര്യയെ കാണാനില്ലെന്ന് ഇയാള്‍ പോലീസില്‍ പരാതി നല്‍കി. എന്നാല്‍ സെപ്റ്റംബര്‍ 10-ന് സ്വപ്നാലിയുടെ അമ്മ സംഗീത മകളുടെ തിരോധാനത്തില്‍ മരുമകന്‍ സുകാന്തിന് ബന്ധമുണ്ടെന്ന ആരോപണവുമായി രംഗത്തെത്തി. ഇവര്‍ പോലീസില്‍ പരാതിയും നല്‍കി. തുടര്‍ന്നുനടത്തിയ ചോദ്യംചെയ്യലിലാണ് സ്വപ്നാലിയെ കൊലപ്പെടുത്തിയെന്ന് സുകാന്ത് സമ്മതിച്ചത്.