യുവതി ഭർതൃവീട്ടിൽ തൂങ്ങിമരിച്ചു; വിവാഹം 10 മാസം മുമ്പ്, ദുരൂഹതയെന്ന് ബന്ധുക്കൾ

ഉപ്പുതറ: യുവതി ഭര്‍തൃവീട്ടില്‍ തൂങ്ങിമരിച്ചു. വളകോട് പുത്തന്‍വീട്ടില്‍ പി.എസ്.ജോബിഷിന്റെ ഭാര്യ എം.കെ.ഷീജ (27) ആണ് മരിച്ചത്. സംഭവത്തില്‍ ദുരൂഹതയുണ്ടെന്ന് യുവതിയുടെ ബന്ധുക്കള്‍ ആരോപിച്ചു. 10 മാസം മുന്‍പാണ്, ഹെലിബറിയ വാഴപ്പറമ്പില്‍ കുട്ടപ്പന്റെയും ചിന്നമ്മയുടെയും മകള്‍ ഷീജയും, ജോബിഷും വിവാഹിതരായത്. ജോബിഷ് മദ്യപിച്ച് വീട്ടിലെത്തി മര്‍ദിക്കുമായിരുന്നെന്ന് ഷീജ വീട്ടുകാരോട് പറഞ്ഞിരുന്നു. ഭര്‍ത്താവിന്റെ മാതാപിതാക്കളും വഴക്കുണ്ടാക്കിയിരുന്നെന്ന് ഷീജയുടെ സഹോദരന്‍ അരുണ്‍ പറഞ്ഞു. പ്രശ്നങ്ങള്‍ പറഞ്ഞുതീര്‍ക്കാന്‍ ശ്രമിച്ചിരുന്നു. രണ്ടാഴ്ചയായി ഷീജ സ്വന്തം വീട്ടിലായിരുന്നു. ഓണത്തിനുള്ള സാധനങ്ങള്‍ വാങ്ങാന്‍ വീട്ടുകാര്‍ക്കൊപ്പം കഴിഞ്ഞ ദിവസം ഏലപ്പാറയിലെത്തിയ ഷീജയെ ജോബിഷ് അവിടെനിന്ന് കൂട്ടിക്കൊണ്ടുപോകുകയായിരുന്നു. തിരുവോണനാളില്‍ ഇരുവരും ഹെലിബറിയയിലെ വീട്ടില്‍ വന്നിരുന്നു. നാലുമണിയോടെ മടങ്ങി. വെള്ളിയാഴ്ച രാവിലെ 9.40-ഓടെ ജോബിഷ് വിളിച്ച് ഷീജ പോയെന്നും പെട്ടെന്ന് വരാനും പറഞ്ഞു. കാര്യം തിരക്കിയെങ്കിലും കൃത്യമായി മറുപടി പറഞ്ഞില്ല. വീട്ടുകാര്‍ വളകോട്ടിലെ വീട്ടില്‍ ചെന്നപ്പോള്‍ ജോബിഷും മാതാപിതാക്കളും മാത്രമേ ഉണ്ടായിരുന്നുള്ളൂ. ഷീജയുടെ കാര്യം തിരക്കിയപ്പോള്‍ ആശുപത്രിയിലേക്ക് കൊണ്ടുപോയെന്ന് പറഞ്ഞു. ആശുപത്രിയില്‍ എത്തിയശേഷമാണ് മരണവിവരം അറിഞ്ഞത്. ഷീജ ആത്മഹത്യചെയ്യാന്‍ സാധ്യതയില്ലെന്നും ഇതുസംബന്ധിച്ച് അന്വേഷണം വേണമെന്നും അരുണ്‍ ആവശ്യപ്പെട്ടു. ഷൈജു, ലീന, അരുണ്‍ എന്നിവരാണ് ഷീജയുടെ സഹോദരങ്ങള്‍.