കോട്ടയത്ത് ഓക്സിജൻ കിട്ടാതെ രോഗി മരിച്ചെന്ന് പരാതി; ഡോക്ടറെ ആക്രമിക്കാൻ ശ്രമിച്ചതിനും കേസ്

ഗാന്ധിനഗർ: കോട്ടയം മെഡിക്കൽ കോളേജിലെ ജനറൽ വാർഡിൽ ഓക്സിജൻ ലഭിക്കാതെ രോഗി മരിച്ചതായി പരാതി. ഇടുക്കി, പാറേമാവ്‌ പുഴങ്കരയിൽ തങ്കച്ചൻ (67) മൂക്കിൽ ഘടിപ്പിച്ചിരുന്ന ട്യൂബ് മാറിയതിനാൽ ഓക്സിജൻ ലഭിക്കാതെ മരിച്ചെന്നാണ്‌ ബന്ധുക്കളുടെ ആരോപണം. സംഭവസമയത്ത് സ്ഥലത്തെത്തിയ ഹൗസ് സർജനെ രോഗിയുടെ മകൻ ടി.പി.അജേഷ് ആക്രമിക്കാൻ ശ്രമിച്ചെന്നും പരാതിയുണ്ട്. ഈ പരാതിയിൽ അജേഷിന്റെ പേരിൽ പോലീസ് കേസ് എടുത്ത് മജിസ്ട്രേറ്റിന് മുന്നിൽ ഹാജരാക്കി. ഡോക്ടറെ ആക്രമിക്കാൻ ശ്രമിച്ചതിൽ നടപടി ആവശ്യപ്പെട്ട് ഹൗസ് സർജന്മാരും പി.ജി. ഡോക്ടർമാരും പരാതി നൽകി. ചൊവ്വാഴ്ച ആശുപത്രിയിലെ ജനറൽ മെഡിസിൻ രണ്ടാം വാർഡിലാണ് സംഭവം. ശ്വാസതടസ്സമടക്കമുള്ള രോഗങ്ങളാൽ ഗുരുതരാവസ്ഥയിലാണ് തങ്കച്ചനെ ആശുപത്രിയിൽ പ്രവേശിപ്പിച്ചത്. മൂക്കിലെ ട്യൂബിലൂടെയാണ് ഓക്സിജൻ നൽകിയിരുന്നത്. ചൊവ്വാഴ്ച രാത്രി മൂക്കിലെ ട്യൂബ് മാറിയതായി കണ്ട മകൻ വിവരം നഴ്സിനെ അറിയിച്ചു. എന്നാൽ, ഡോക്ടറാണ് ട്യൂബ് ഘടിപ്പിക്കേണ്ടതെന്ന്‌ നഴ്‌സ്‌ പറഞ്ഞു. അൽപ്പസമയത്തിനുശേഷം ഹൗസ് സർജൻ ഡോ. അനീറ്റ എത്തിയപ്പോൾ രോഗി മരിച്ചിരുന്നു. ഇത് ബന്ധുക്കളെ അറിയിച്ചതോടെ മകൻ അജേഷ് ഡോക്ടറെ ആക്രമിക്കുകയായിരുന്നു. രോഗിയുടെ ബന്ധുക്കൾക്കിരിക്കാനുള്ള സ്റ്റൂൾ എടുത്ത് ഡോക്ടറെ അടിക്കാനോങ്ങി. ഇത് തടഞ്ഞപ്പോൾ നിലത്തെറിെഞ്ഞന്നും ഡോക്ടറെ അസഭ്യം പറഞ്ഞെന്നും മറ്റ് ഡോക്ടർമാർ പറഞ്ഞു. പോലീസുകാർ എത്തി അജേഷിനെയും ബന്ധുക്കളിൽ ചിലരെയും കസ്റ്റഡിയിൽ എടുക്കുകയായിരുന്നു. സംഭവത്തിൽ അന്വേഷണം നടത്തുമെന്ന് ആശുപത്രി അധികൃതർ അറിയിച്ചു. ഗാന്ധിനഗർ സ്റ്റേഷൻ എസ്.എച്ച്.ഒ. ഷിജി കെ.,എസ്.ഐ. മാരായ പ്രദീപ് ലാൽ, സന്തോഷ് മോൻ പി.ആർ., സി.പി.ഒ. മാരായ അനീഷ്, സെബാസ്റ്റ്യൻ, സ്മിജിത്ത് വാസവൻ എന്നിവരാണ് പ്രതിയെ അറസ്റ്റ് ചെയ്തത്.