മത്സ്യത്തൊഴിലാളിക്ക് വെടിയേറ്റ സംഭവം: വെടിയുണ്ട ബാലിസ്റ്റിക് പരിശോധനയ്ക്ക് അയയ്ക്കും

കൊച്ചി∙ വള്ളത്തിൽ നിന്ന മത്സ്യത്തൊഴിലാളിക്ക് കടലിൽ വച്ച് വെടിയേറ്റ സംഭവത്തിൽ, വെടിയുണ്ട ബാലിസ്റ്റിക് പരിശോധനയ്ക്ക് അയയ്ക്കും. ഇന്നലെ ഉച്ചയ്ക്ക് പന്ത്രണ്ടോടെ, നേവിയുടെ പരിശീലന കേന്ദ്രമായ ഐഎൻഎസ് ദ്രോണാചാര്യയ്ക്ക് സമീപമാണു ആലപ്പുഴ തുറവൂർ പടിഞ്ഞാറെ മനക്കോടം മണിച്ചിറ സ്വദേശി സെബാസ്റ്റ്യന് (72) ചെവിയിൽ വെടിയേറ്റത്. അപകടം നടന്ന സമയം നാവികസേനാ ഉദ്യോഗസ്ഥരുടെ ഫയറിങ് പരിശീലനം നടന്നിരുന്നതായി പൊലീസ് സ്ഥിരീകരിച്ചു. ഇവിടെ നിന്ന് ഉന്നം തെറ്റിവന്ന വെടിയുണ്ടയാണ് സെബാസ്റ്റ്യന്റെ ചെവിയിൽ കൊണ്ടതെന്നാണ് നിഗമനം. പരിസരത്ത് വെടിയുണ്ട എത്താനുള്ള മറ്റ് സാധ്യതകളില്ലെന്നും അന്വേഷണത്തിൽ വ്യക്തമായി. എന്നാൽ, വെടിയുണ്ട പരിശോധിച്ചതായും നാവികസേന ഇത്തരത്തിലുള്ളവ ഉപയോഗിക്കുന്നില്ലെന്നും നാവികസേനാ അധികൃതർ പറയുന്നു. വെടിയുണ്ട മറ്റാരുടെയോ ആണെന്നും ഇതിലും വലിപ്പമുളള വെടിയുണ്ടകളാണ് ഉപയോഗിക്കുന്നതെന്നും നാവികസേനാ അധികൃതർ വ്യക്തമാക്കി.