മാങ്കുളത്ത് ചാടിവീണ് ദേഹത്ത് കടിച്ചു പുലി; വാക്കത്തികൊണ്ട് വെട്ടിക്കൊന്ന് ആദിവാസി

തൊടുപുഴ ഇടുക്കി മാങ്കുളത്ത് ആക്രമിച്ച പുലിയെ ആദിവാസി വെട്ടിക്കൊന്നു. ചിക്കണാംകുടി കോളനിയിലെ ഗോപാലനെയാണു പുലി ആക്രമിച്ചത്. കയ്യിലും കാലിലും കടിച്ച പുലിയെ ഗോപാലന്‍ വാക്കത്തികൊണ്ടു വെട്ടുകയായിരുന്നു. രാവിലെ ഗോപാലന്‍ സഹോദരന്റെ വീട്ടിലേക്കു പോകുമ്പോഴായിരുന്നു ആക്രമണം. പുലിയെ കൊന്നതു സ്വയരക്ഷാര്‍ഥമെന്നു വനംവകുപ്പ് അറിയിച്ചു. കഴിഞ്ഞദിവസം കോഴിക്കൂട് തപ്പിയെത്തിയ പുലി പ്ലാസ്റ്റിക് വലയില്‍ കുടുങ്ങിയെങ്കിലും വനം വകുപ്പ് ഉദ്യോഗസ്ഥരെത്തും മുന്‍പേ വല മുറിച്ച് രക്ഷപ്പെട്ടിരുന്നു. ആറാം മൈലിനു സമീപം കോട്ടായി ബിനോയിയുടെ വീടിനടുത്തു കോഴിക്കൂടിനു വിരിച്ചിരുന്ന വലയിലാണു പുലര്‍ച്ചെ പുലി കുരുങ്ങിയത്. ബഹളം കേട്ട് ബിനോയിയും സമീപവാസികളും എത്തിയെങ്കിലും അതിനിടെ വല പൊട്ടിച്ച് പുലി ഓടിക്കളഞ്ഞു. കൂട്ടിലുണ്ടായിരുന്ന 5 കോഴികളെ പുലി കൊന്നതായി ബിനോയ് പറഞ്ഞു. രണ്ടാഴ്ച മുന്‍പ് ആറാംമൈല്‍ അടയ്ക്കാപറമ്പില്‍ ബിജു ജോണിന്റെ 2 ആടുകളെ പുലി കൊന്നിരുന്നു.