വിമാനത്തില്‍ പുകവലിച്ച യൂട്യൂബര്‍ക്കെതിരെ ലുക്ക് ഔട്ട് നോട്ടീസ്

സ്പൈസ് ജെറ്റ് വിമാനത്തില്‍ സിഗരറ്റ് വലിച്ചതുമായി ബന്ധപ്പെട്ട കേസില്‍ ഒളിവിലുള്ള യൂട്യൂബര്‍ ബോബി കതാരിയയ്ക്കെതിരെ ലുക്ക് ഔട്ട് നോട്ടീസ്. ബോബിയുമായി ബന്ധപ്പെട്ട ഇടങ്ങളില്‍ റെയ്ഡ് നടത്തിയിട്ടും ഇയാളെ കുറിച്ച് യാതൊരു വിവരവും ലഭിച്ചിരുന്നില്ല. ഇതിന് പിന്നാലെയാണ് പൊലീസ് ലുക്ക് ഔട്ട് നോട്ടീസ് പുറപ്പെടുവിച്ചിരിക്കുന്നത്. വിമാനത്തില്‍ പുകവലിക്കുന്ന വീഡിയോ വൈറലായതിനെ തുടര്‍ന്ന് ബോബി കതാരിയയ്ക്കെതിരെ ഡല്‍ഹി പൊലീസ് കേസെടുത്തിരുന്നു. സ്പൈസ് ജെറ്റ് വിമാന കമ്പനിയും ഇയാള്‍ക്കെതിരെ പരാതി നല്‍കിയിട്ടുണ്ട്. ബോബി കതാരിയയുടെ മൊബൈല്‍ സ്വിച്ച് ഓഫ് ആണെന്നും, ഉടന്‍ അറസ്റ്റ് ചെയ്യുമെന്നും ഡല്‍ഹി പൊലീസ് അറിയിച്ചു. റോഡിന് നടുവില്‍ മേശയിട്ട് വാഹനഗതാഗതം തടസ്സപ്പെടുത്തി മദ്യം കഴിച്ച സംഭവത്തില്‍ ഉത്തരാഖണ്ഡ് പൊലീസും ബോബി കതാരിയയ്ക്കെതിരെ കേസെടുത്തിരുന്നു. ഒളിവില്‍ കഴിയുന്ന പ്രതിയെ കണ്ടെത്താന്‍ സഹായിക്കുന്നവര്‍ക്ക് 25,000 രൂപ പാരിതോഷികവും പ്രഖ്യാപിച്ചിട്ടുണ്ട്. മുസ്സൂറി കിമാഡി മാര്‍ഗില്‍ നടുറോഡില്‍ കസേരയും മേശയും ഇട്ട് ഗതാഗതം തടസ്സപ്പെടുത്തുകയും ശേഷം മദ്യപിക്കുന്നതിന്റെ ദൃശ്യങ്ങള്‍ കതാരി സമൂഹമാധ്യമങ്ങളില്‍ പങ്കുവെക്കുകയും ചെയ്തിരുന്നു.