കോഴിക്കോട് വിവാഹ വീട്ടില്‍ നിന്ന് മോഷണം പോയ സ്വര്‍ണാഭരണങ്ങള്‍ കണ്ടെത്തി

കോഴിക്കോട് വാണിമേലില്‍ വിവാഹ വീട്ടില്‍ നിന്ന് മോഷണം പോയ സ്വര്‍ണാഭരണങ്ങള്‍ കണ്ടെത്തി. വീട്ടിനകത്തെ കക്കൂസിന്റെ ഫ്ലഷ് ടാങ്കില്‍ നിന്നാണ് ആഭരണങ്ങള്‍ കണ്ടെത്തിയത്. സംഭവത്തില്‍ ദുരൂഹതയുണ്ടെന്ന് പോലീസ്. വാണിമേല്‍ വെള്ളിയോട് സ്വദേശി ഹാഷിം കോയ തങ്ങളുടെ വീട്ടില്‍ നിന്ന് മോഷണം പോയ 28 പവന്‍ സ്വര്‍ണ്ണമാണ് അഞ്ചു ദിവസത്തിന് ശേഷം കണ്ടെത്തിയത്. ഇന്ന് രാവിലെയാണ് ആഭരണങ്ങള്‍ കക്കൂസിലെ ഫ്ലഷില്‍ കണ്ടെത്തിയതായി വീട്ടുടമ പോലീസില്‍ വിവരം അറിയിച്ചത്. ഫ്ലഷില്‍ നിന്ന് വെള്ളം ലഭിക്കാത്തതിനാല്‍ തുറന്ന് പരിശോധിപ്പോഴാണ് ആഭരണങ്ങള്‍ കണ്ടെത്തിയതെന്നാണ് മൊഴി. വളയം പോലീസ് വീട്ടില്‍ പരിശോധന നടത്തി. വെള്ളിയാഴ്ച രാത്രിയാണ് വിവാഹ വീട്ടില്‍ നിന്ന് 28 പവന്‍ കാണാതായത്. മകളുടെ വിവാഹത്തിന് വീട്ടിലെ കിടപ്പ് മുറിയില്‍ സൂക്ഷിച്ച് വച്ച സ്വര്‍ണ്ണാഭരണങ്ങളാണ് തലേ ദിവസം നഷ്ടമായത്. ഫ്ലഷില്‍ അടക്കം പോലീസ് അന്ന് തന്നെ പരിശോധന നടത്തിയിരുന്നു. വീട്ടില്‍ കല്യാണത്തിന് അതിഥികളായി എത്തിയവരെ കേന്ദ്രീകരിച്ചായിരുന്നു അന്വേഷണം. പലരുടെയും വിരലടയാളവും പോലീസ് ശേഖരിച്ചിരുന്നു. അന്വേഷണം നിര്‍ണായക ഘട്ടത്തില്‍ എത്തിയപ്പോഴാണ് അഭരണങ്ങള്‍ കണ്ടെത്തിയതായി വീട്ടുകാര്‍ പോലീസിനെ അറിയിച്ചത്. തൊണ്ടി മുതല്‍ കോടതിയില്‍ ഹാജരാക്കുമെന്ന് പോലീസ് അറിയിച്ചു. ദുരൂഹതയുണ്ടെന്നും അന്വേഷണം തുടരുമെന്നും പോലീസ്.