പെണ്‍കുട്ടിയെ പെട്രോളൊഴിച്ച് കത്തിച്ചുകൊന്ന സംഭവം; പ്രതികളിലൊരാള്‍ മുന്‍പ് മറ്റൊരു പെണ്‍കുട്ടിയെ തട്ടിക്കൊണ്ടുപോയ കേസില്‍ പ്രതി

ഝാര്‍ഖണ്ഡിലെ ദുംകയില്‍ പ്രണയാഭ്യര്‍ത്ഥന നിരസിച്ചതിനെ തുടര്‍ന്ന് പെണ്‍കുട്ടി കൊല്ലപ്പെട്ട സംഭവത്തിലെ പ്രതികളിലൊരാള്‍ മുന്‍പ് മറ്റൊരു പെണ്‍കുട്ടിയെ തട്ടിക്കൊണ്ടുപോയ കേസില്‍ പ്രതിയെന്ന് റിപ്പോര്‍ട്ട്. ഒന്നാം പ്രതിയായ ഷാരൂഖ് ഖാന് പെട്രോള്‍ സംഘടിപ്പിച്ചുനല്‍കിയ നയീം ഖാന്‍ അഥവാ ഛോട്ടു എന്നയാള്‍ക്കെതിരെയാണ് വെളിപ്പെടുത്തല്‍. എന്‍ഡിടിവിയാണ് വാര്‍ത്ത റിപ്പോര്‍ട്ട് ചെയ്തത്. 2021ല്‍ നയീം ഖാന്‍ ഒരു പെണ്‍കുട്ടിയെ തട്ടിക്കൊണ്ടുപോയതില്‍ അറസ്റ്റിലായതായി എന്‍ഡിടിവി പറയുന്നു. റോഡില്‍ വച്ച് തന്നോട് സംസാരിക്കാന്‍ ഇയാള്‍ പലതവണ ശ്രമിച്ചിട്ടുണ്ടെന്നും ഒരു ദിവസം തന്നെ തട്ടിക്കൊണ്ടുപോയി കസേരയില്‍ കെട്ടിയിട്ടു എന്നും പെണ്‍കുട്ടി പറഞ്ഞതായി റിപ്പോര്‍ട്ടില്‍ സൂചിപ്പിക്കുന്നു. അയാളെ വിവാഹം കഴിക്കണമെന്നായിരുന്നു ആവശ്യം. വഴങ്ങിയില്ലെങ്കില്‍ ദുബായിലേക്ക് അയക്കുമെന്ന് പറഞ്ഞു. അമ്മ അഭിഭാഷകയായ പ്രിയ സിംഗിനെ വിളിച്ചു. അങ്ങനെ പൊലീസ് എത്തിയതുകൊണ്ട് താന്‍ രക്ഷപ്പെട്ടു. ജാമ്യം ലഭിച്ചപ്പോള്‍ വീണ്ടും തന്നെ ഭീഷണിപ്പെടുത്തിയെന്നും പെണ്‍കുട്ടി പറഞ്ഞതായി റിപ്പോര്‍ട്ടില്‍ സൂചിപ്പിക്കുന്നു. കേസ് ഏറ്റെടുത്തതിന് അഭിഭാഷകനെയും ഇയാള്‍ ഭീഷണിപ്പെടുത്തി. ഝാര്‍ഖണ്ഡിലെ ദുംകയില്‍ പ്രണയാഭ്യര്‍ത്ഥന നിരസിച്ചതിനെ തുടര്‍ന്ന് കൊല്ലപ്പെട്ട പെണ്‍കുട്ടിയ്ക്ക് 15 വയസെന്ന് കണ്ടെത്തിയിരുന്നു. കുട്ടിയ്ക്ക് 19 വയസുണ്ടെന്നായിരുന്നു പൊലീസ് റിപ്പോര്‍ട്ടിലുണ്ടായിരുന്നത്. എന്നാല്‍, സംസ്ഥാന ശിശുക്ഷേമ സമിതിയാണ് പെണ്‍കുട്ടിക്ക് 15 വയസ് മാത്രമേ ഉണ്ടായിരുന്നുള്ളൂ എന്ന് കണ്ടെത്തി. ഇതോടെ പിടിയിലായ യുവാവിനെതിരെ പോക്‌സോ വകുപ്പുകള്‍ കൂടി ചുമത്താന്‍ സമിതി നിര്‍ദേശിച്ചു. ഈ മാസം 23നാണ് രാജ്യത്തെയാകെ നടുക്കിയ സംഭവമുണ്ടായത്. പ്ലസ് ടുവില്‍ പഠിക്കുന്ന പെണ്‍കുട്ടിയെ ഷാരൂഖ് എന്നയാളാണ് കത്തിച്ചുകൊന്നത്. പ്രണയാഭ്യര്‍ത്ഥന നിരസിച്ചതിനെതുടര്‍ന്ന് ഷാരൂഖ് കുട്ടിയെ കത്തിക്കുകയായിരുന്നു. ഗുരുതരമായി പരുക്കേറ്റ പെണ്‍കുട്ടിയെ ആശുപത്രിയില്‍ പ്രവേശിപ്പിച്ചെങ്കിലും ഈ മാസം 28ന് മരണത്തിനു കീഴടങ്ങി. കുട്ടി ഉറങ്ങിക്കിടക്കെ ജനാലയിലൂടെ പെട്രോള്‍ ഒഴിച്ച പ്രതി തീകത്തിച്ചിട്ട് സ്ഥലംവിടുകയായിരുന്നു.