നവദമ്പതികള്‍ സഞ്ചരിച്ച കാര്‍ സ്റ്റേഷന് മുന്നിലിട്ട് വധുവിന്റെ സഹോദരന്‍ കത്തിച്ചു

തേനി: സഹോദരി പ്രണയവിവാഹം കഴിച്ചതിന്റെ വിരോധത്തില്‍ സഹോദരന്‍ സ്റ്റേഷനിലെത്തി വധൂവരന്മാര്‍ സഞ്ചരിച്ചിരുന്ന വാഹനം കത്തിച്ചു. തേനി ചിന്നമനൂരിലാണു സംഭവം. ചിന്നമനൂര്‍ സ്വദേശിയുടെ വിവാഹത്തിനു ശേഷമാണു സംഭവം. പ്രണയവിവാഹമായിരുന്നു. മകളെ കാണാനില്ലെന്ന പരാതിയുമായി വധുവിന്റെ പിതാവ് ചിന്നമനൂര്‍ സ്റ്റേഷനില്‍ പരാതി നല്‍കിയിരുന്നു. ബന്ധുക്കള്‍ പ്രശ്‌നമുണ്ടാക്കുമെന്നു ഭയന്ന് വിവാഹത്തിനു ശേഷം ദമ്പതികള്‍ അതേ സ്റ്റേഷനില്‍ അഭയം തേടി. പൊലീസ് ബന്ധുക്കളെ സ്റ്റേഷനിലേക്കു വിളിപ്പിച്ച് ചര്‍ച്ച നടത്തുന്നതിനിടെ വധുവിന്റെ സഹോദരനും സംഘവും സ്ഥലത്തെത്തി ദമ്പതികള്‍ സഞ്ചരിച്ച ആഡംബര കാര്‍ സ്റ്റേഷനു മുന്‍പില്‍ പെട്രോളൊഴിച്ചു കത്തിക്കുകയായിരുന്നു. വാഹനം പൂര്‍ണമായി കത്തിനശിച്ചു. സംഭവത്തിനുശേഷം കടന്നുകളഞ്ഞ വധുവിന്റെ സഹോദരന്‍ നല്ലപെരുമാളിനെ (26) പൊലീസ് പിന്നീട് അറസ്റ്റ് ചെയ്തു.