പേരാവൂരില്‍ ട്രാന്‍സ് ദമ്പതിമാരെ ആക്രമിച്ചു; അഞ്ചുപേര്‍ക്കെതിരെ കേസ്

പേരാവൂര്‍: തുണ്ടിയില്‍ കുട്ടിച്ചാത്തന്‍കണ്ടിയില്‍ ട്രാന്‍സ്ജന്‍ഡര്‍ ദമ്പതിമാരെ ബന്ധുവും സുഹൃത്തുക്കളും ചേര്‍ന്ന് ആക്രമിച്ചതായി പരാതി.സാരമായി പരിക്കേറ്റ ട്രാന്‍സ്ദമ്പതിമാരായ ശിഖ (29), കോക്കാട്ട് ബെനിഷ്യോ (45) എന്നിവരെ ജില്ലാ ആസ്പത്രിയില്‍ പ്രവേശിപ്പിച്ചു.ദമ്പതിമാരുടെ പരാതിയില്‍ പേരാവൂര്‍ പോലീസ് ബെനീഷ്യോയുടെ സഹോദരനടക്കം അഞ്ചുപേര്‍ക്കെതിരേ കേസെടുത്ത് അന്വേഷണം തുടങ്ങി. തിങ്കളാഴ്ച രാത്രി 11.30-ഓടെയാണ് സംഭവം. വീടിനുനേരേ കല്ലെറിഞ്ഞ ശേഷമായിരുന്നു ആക്രമണം.ശിഖയുടെ മുടി ചുറ്റിപ്പിടിച്ച് തല ഭിത്തിയിലിടിക്കുകയും നെഞ്ചിലിടിക്കുകയും ചെയ്തതായി പരാതിയില്‍ പറയുന്നു. കഴുത്തില്‍ മുറിവേറ്റിട്ടുണ്ട്. ബൈക്കും തകര്‍ത്തു. ശിഖ ഫോണില്‍ വിളിച്ചറിയിച്ചതിനെത്തുടര്‍ന്ന് സ്ഥലത്തെത്തിയ പോലീസാണ് ഇരുവരെയും ആസ്പത്രിയിലെത്തിച്ചത്. ബെനീഷ്യോയുടെ സഹോദരന്‍ കോക്കാട്ട് സന്തോഷ്, സന്തോഷിന്റെ സുഹൃത്തുക്കളായ രതീശന്‍, കോക്കാട്ട് തോമസ്, സോമേഷ്, ജോഫി ആന്റണി എന്നിവരുടെ പേരിലാണ് പോലീസ് കേസെടുത്തത്.ഫെബ്രുവരിയിലായിരുന്നു ഇവരുടെ വിവാഹം. എറണാകുളത്ത് വാടകയ്ക്ക് താമസിച്ചിരുന്ന ദമ്പതിമാര്‍ സാമ്പത്തിക ബുദ്ധിമുട്ട് കാരണമാണ് തുണ്ടിയിലെ തറവാട് വീട്ടിലേക്ക് താമസം മാറിയത്. അമ്മയ്ക്കും സഹോദരനും ദമ്പതിമാര്‍ വീട്ടില്‍ താമസിക്കുന്നതില്‍ താത്പര്യമില്ലെന്ന് ബെനീഷ്യോ പറയുന്നു.ഇതേത്തുടര്‍ന്ന് പലതവണ വീട്ടില്‍ പ്രശ്നങ്ങളുണ്ടാകുകയും പോലീസില്‍ പരാതി നല്‍കുകയും ചെയ്തിരുന്നു.