ക്ഷണം ഉണ്ടാക്കിയില്ല, കന്നുകാലികള്‍ക്ക് തീറ്റ നല്‍കിയില്ല; 12 കാരിയെ കൊലപ്പെടുത്തി മൃതദേഹം വനത്തില്‍ തള്ളി; മാതാപിതാക്കള്‍ അറസ്റ്റില്‍

കൃത്യസമയത്ത് ഭക്ഷണം പാകം ചെയ്യാത്തതിനും, കന്നുകാലികള്‍ക്ക് തീറ്റ നല്‍കാത്തതിന്റെയും പേരില്‍ 12 കാരി മകളെ മാതാപിതാക്കള്‍ കൊലപ്പെടുത്തി. അച്ഛന്‍ മകളെ വടി ഉപയോഗിച്ച് തലയ്ക്കടിച്ച് കൊലപ്പെടുത്തുകയായിരുന്നു. പിന്നീട് ഭാര്യയുടെ സഹായത്തോടെ മകളുടെ മൃതദേഹം അടുത്തുള്ള വനത്തില്‍ തള്ളി. ഛത്തീസ്ഗഡിലെ സര്‍ഗുജ ജില്ലയിലാണ് സംഭവം. ഈ വര്‍ഷം ജൂണിലാണ് കൊലപാതകം നടന്നത്. ജൂണ്‍ 28 ന് ഖല ദാരിമ ഗ്രാമത്തിലെ താമസക്കാരനായ വിശ്വനാഥ് എക്ക വീട്ടിലെത്തിയപ്പോള്‍ മകള്‍ ഭക്ഷണം പാകം ചെയ്തിട്ടില്ലെന്നും കാളകള്‍ക്ക് കാലിത്തീറ്റ നല്‍കിയില്ലെന്നും മനസിലാക്കി. കുപിതനായ പിതാവ് മകളെ വടികൊണ്ട് അടിച്ചു. പെണ്‍കുട്ടി നിലത്ത് വീഴുകയും തല ഒരു കല്ലില്‍ ഇടിക്കുകയും സംഭവസ്ഥലത്ത് തന്നെ മരിക്കുകയും ചെയ്തു. സംഭവ സമയത്ത് ഇരയുടെ അമ്മയും വീട്ടിലുണ്ടായിരുന്നു. പിന്നീട് വിശ്വനാഥ് എക്കയും ഭാര്യയും ചേര്‍ന്ന് മൃതദേഹം സമീപത്തെ കാട്ടില്‍ തള്ളുകയായിരുന്നു. ശേഷം പൊലീസിനെ തെറ്റിദ്ധരിപ്പിക്കാന്‍ മകളെ കാണാനില്ലെന്ന് ദമ്പതികള്‍ പരാതിയും നല്‍കി. ഓഗസ്റ്റ് 26 ന് പെണ്‍കുട്ടിയുടെ പിതാവ് തന്നെ പൊലീസിനെ സമീപിക്കുകയും, മകളുടെ അഴുകിയ മൃതദേഹം തുലാം വനത്തില്‍ കിടക്കുന്നുണ്ടെന്നും, വസ്ത്രങ്ങളും ചെരിപ്പുകളും ഉപയോഗിച്ച് അവളെ തിരിച്ചറിഞ്ഞതായും പറഞ്ഞു. എന്നാല്‍ ചോദ്യം ചെയ്യലില്‍ വിശ്വനാഥ് എക്കയുടെയും ഭാര്യയുടെയും പറഞ്ഞത് കള്ളമാണെന്ന് പൊലീസ് കണ്ടെത്തി. വിശദമായ ചോദ്യം ചെയ്യലില്‍ പ്രതികള്‍ കുറ്റം സമ്മതിച്ചു. പെട്ടന്നുണ്ടായ ദേഷ്യത്തിലാണ് കുറ്റം ചെയ്തതെന്ന് പ്രതികള്‍ മൊഴി നല്‍കി. ഇരുവര്‍ക്കുമെതിരെ ഇന്ത്യന്‍ ശിക്ഷാ നിയമത്തിലെ (ഐപിസി) 302 (കൊലപാതകം), 201 (കുറ്റകൃത്യത്തിന്റെ തെളിവുകള്‍ അപ്രത്യക്ഷമാക്കല്‍) എന്നീ വകുപ്പുകള്‍ പ്രകാരം കേസെടുത്തിട്ടുണ്ടെന്നും കൂടുതല്‍ അന്വേഷണം നടക്കുന്നുണ്ടെന്നും പൊലീസ് അറിയിച്ചു.