കെ.സി. ലിതാരയുടെ കുടുംബത്തെ ഭീഷണിപ്പെടുത്തിയെന്ന പരാതി; കുറ്റ്യാടി പൊലീസ് കേസെടുത്തു

ബാസ്‌ക്കറ്റ് ബോള്‍ താരം കെ.സി. ലിതാരയുടെ കുടുംബത്തെ ഭീഷണിപ്പെടുത്തിയെന്ന പരാതിയില്‍ കുറ്റ്യാടി പൊലീസ് കേസെടുത്തു. ലിതാരയുടെ അമ്മയുടെ പരാതിയില്‍ കണ്ടാലറിയാവുന്ന രണ്ട് പേര്‍ക്കെതിരെയാണ് കേസ്. മുദ്ര പേപ്പറില്‍ ബലമായി ഒപ്പിടീപ്പിക്കാന്‍ ശ്രമിച്ചു, വീട്ടില്‍ അതിക്രമിച്ചു കയറി എന്നീ കുറ്റങ്ങള്‍ ചുമത്തിയാണ് പൊലിസ് കേസ് രജിസ്റ്റര്‍ ചെയ്തത്. കേസില്‍ ആരോപണ വിധേയനായ കോച്ച് രവി സിംഗിനെതിരായ പരാതി പിന്‍വലിക്കണമെന്നാവശ്യപ്പെട്ട് ഹിന്ദി സംസാരിക്കുന്ന രണ്ട് പേര്‍ വീട്ടില്‍ എത്തി ഭീഷണിപ്പെടുത്തിയെന്നായിരുന്നു കുടുംബത്തിന്റെ ആരോപണം. 25 ലക്ഷം രൂപ നല്‍കാമെന്ന് വാഗ്ധാനം ചെയ്തതായും പരാതിയില്‍ പറയുന്നു. അമ്മ ലളിത യുടെയും വീട്ടുകാരുടെയും വിശദമായ മൊഴി പോലിസ് രേഖപെടുത്തി. ലിതാരയുടെ വീട്ടിലെത്തി പരിശോധന നടത്തി. സമീപ പ്രദേശങ്ങളിലെ സിസിടിവി ദൃശ്യങ്ങളും പൊലീസ് ശേഖരിക്കുന്നുണ്ട്. അതേസമയം, സംഭവത്തിന് തൊട്ട് മുന്‍പ് വീട്ടില്‍ എത്തിയ കാനറാബാങ്ക് ഉദ്യോഗസ്ഥരുടെ മൊഴിയും പൊലീസ് രേഖപ്പെടുത്തിയേക്കും. കെ.സി. ലിതാരയുടെ ദുരൂഹമരണത്തില്‍ ബിഹാര്‍ പൊലീസ് അന്വേഷണം അവസാനിപ്പിക്കാന്‍ ശ്രമം തുടരുന്നതിനിടെയാണ് കുടുംബത്തിനു നേരെയുള്ള ഭീഷണി. കോച്ച് രവി സിംഗിന്റെ ശാരീരിക, മാനസിക പീഡനമാണ് മരണകാരണമെന്നാണ് മാതാപിതാക്കള്‍ ആരോപിക്കുന്നത്. എന്നാല്‍ അന്വേഷണത്തില്‍ ബിഹാര്‍ പൊലീസ് ഇക്കാര്യം പരിഗണിച്ചിട്ടില്ല. കോച്ചിനെ ഇതുവരെ ചോദ്യം ചെയ്തില്ല. അന്വേഷണ റിപ്പോര്‍ട്ടില്‍ നടപടിയായില്ലെന്ന് അന്വേഷണ ഉദ്യോഗസ്ഥന്‍ ശംഭുസിംഗ് പറഞ്ഞു. സര്‍ക്കാര്‍ ഇടപെടല്‍ തേടി കുടുംബം കായിക മന്ത്രിക്ക് നിവേദനം നല്‍കും. ഏപ്രില്‍ 26നാണ് കെ.സി. ലിതാരയെ പട്നയിലെ താമസസ്ഥലത്ത് തൂങ്ങിമരിച്ച നിലയില്‍ കണ്ടെത്തിയത്. ഇന്ദിരാ ഗാന്ധി ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സില്‍ സൂക്ഷിച്ച മൃതദേഹം പോസ്റ്റ്മോര്‍ട്ടത്തിന് ശേഷം ഏപ്രില്‍ 27നാണ് ബന്ധുക്കള്‍ക്ക് വിട്ടുനല്‍കിയത്. മരണം നടന്ന ദിവസം ഉച്ചയ്ക്ക് 1.40 ഓടെയാണ് ലിതാരയുടെ മൃതദേഹം പോസ്റ്റ്മോര്‍ട്ടം നടത്തിയത്. ആ സമയം ആരോപണ വിധേയനായ കോച്ച് രവി സിംഗ് ആശുപത്രിയിലുണ്ടായിരുന്നു.