പല വീടുകളിലും പത്രം ലഭിക്കുന്നില്ലെന്ന് പരാതി; നാട്ടുകാര്‍ തിരക്കിയിറങ്ങിയതോടെ വ്യത്യസ്തനാം കള്ളന്‍ കുടുങ്ങി

തിരുവനന്തപുരം ജില്ലയിലെ കല്ലമ്പലം, നാവായിക്കുളം മേഖലകളിലുള്ള പല വീടുകളിലും പത്രം ലഭിക്കുന്നില്ലെന്ന് പരാതി. പത്ര ഏജന്റുമാരെ സമീപിച്ചതോടെ കൃത്യമായി പത്രം ഇടുന്നുണ്ടെന്ന വിവരമാണ് ലഭിച്ചത്. തുടര്‍ന്ന് അതിരാവിലെ നാട്ടുകാര്‍ തിരക്കിയിറങ്ങിയതോടെയാണ് വ്യത്യസ്തനാം കള്ളന്‍ കുടുങ്ങിയത്. കപ്പാംവിള പത്ര ഏജന്റിന്റെ നേതൃത്വത്തില്‍ നടത്തിയ അന്വേഷണത്തിലാണ് പത്രം മോഷ്ടിക്കുന്നതിനിടെ മുക്കുകട സ്വദേശിയായ യുവാവിനെ പിടികൂടിയത്. ഇയാളെ താക്കീത് നല്‍കി വിട്ടയക്കുകയായിരുന്നു. പുലര്‍ച്ചെ ഏജന്റുമാര്‍ നേരിട്ടും വിതരണക്കാര്‍ മുഖേനയും വീടുകളുടെ ഗേറ്റില്‍ സ്ഥാപിച്ചിരിക്കുന്ന ബോക്‌സിലും പൈപ്പിലും വയ്ക്കുന്ന പത്രങ്ങളാണ് യുവാവ് എടുത്ത് കൊണ്ട് പോയിരുന്നത്. നാവായിക്കുളം വെള്ളൂര്‍ക്കോണം മുസ്ലിംപള്ളിക്ക് സമീപം ഒരു വീട്ടില്‍ കഴിഞ്ഞ ഒരാഴ്ചയായി പത്രം ലഭിക്കുന്നില്ലെന്ന പരാതിയില്‍ ഇന്നലെ പുലര്‍ച്ചെ 4.30നാണ് കപ്പാംവിള പത്ര ഏജന്റ് അന്വേഷണം നടത്തിയത്. പത്രം പൈപ്പില്‍ വച്ചതിന് ശേഷം വിതരണക്കാരന്‍ ദൂരെ മാറി നിന്ന് വീക്ഷിച്ചപ്പോഴാണ് നാവായിക്കുളം ക്ഷീര സംഘത്തില്‍ കുപ്പിയുമായി പാല്‍ വാങ്ങാന്‍ പോകുകയായിരുന്ന യുവാവ് പത്രമെടുക്കുന്നത് ശ്രദ്ധയില്‍പ്പെട്ടത്. പിടികൂടി പൊലീസില്‍ ഏല്‍പ്പിക്കുമെന്ന് പറഞ്ഞതോടെ യുവാവ് കരച്ചിലായി. അങ്ങനെയാണ് മേലില്‍ ആവര്‍ത്തിക്കില്ലെന്ന ഉറപ്പില്‍ താക്കീത് നല്‍കി ഇയാളെ വിട്ടയച്ചത്. ഈ മേഖലകളില്‍ പതിവായി പത്രം മോഷണം പോകുന്നതിനാല്‍ ഏജന്റും പത്രം വരുത്തുന്നവരും തമ്മില്‍ തര്‍ക്കമുണ്ടാകുന്നത് പതിവ് സംഭവമാണ്.