ജോലിക്കുനിന്ന വീടുകളിൽനിന്ന് കവർന്നത് 22 പവൻ സ്വർണം; യുവതി അറസ്റ്റിൽ

കോലഞ്ചേരി: വീട്ടുജോലിക്കുനിന്ന് 22 പവന്‍ സ്വര്‍ണാഭരണങ്ങള്‍ മോഷ്ടിച്ച യുവതിയെ പുത്തന്‍കുരിശ് പോലീസ് അറസ്റ്റ് ചെയ്തു. ആരക്കുഴ പെരുമ്പല്ലൂര്‍ മാനിക്കല്‍ വീട്ടില്‍ ആശ (41) യാണ് പിടിയിലായത്. കഴിഞ്ഞ മാര്‍ച്ച്, ഏപ്രില്‍ മാസങ്ങളില്‍ കോലഞ്ചേരി സ്വദേശികളായ ചാള്‍സ്, ബെന്നി എന്നിവരുടെ വീടുകളില്‍നിന്നാണ് യുവതി സ്വര്‍ണം മോഷ്ടിച്ചത്. ബെന്നിയുടെ വീട്ടില്‍നിന്ന് ഒമ്പതു പവനും ചാള്‍സിന്റെ വീട്ടില്‍നിന്ന് 13 പവനുമാണ് കവര്‍ന്നത്. മോഷ്ടിച്ച ആഭരണങ്ങള്‍ കോലഞ്ചേരിയിലുള്ള വിവിധ ധനകാര്യ സ്ഥാപനങ്ങളില്‍ വില്‍ക്കുകയും പണയം െവക്കുകയും ചെയ്തു. മോഷണത്തിനു ശേഷം ഒളിവില്‍ പോയ ഇവരെ ഇടുക്കി ബൈസണ്‍വാലിയില്‍നിന്നാണ് കസ്റ്റഡിയിലെടുത്തത്. റൂറല്‍ ജില്ലാ പോലീസ് മേധാവി വിവേക് കുമാറിന്റെ നിര്‍ദേശത്താല്‍ രൂപവത്കരിച്ച പ്രത്യേക അന്വേഷണ സംഘത്തില്‍ ഡിവൈ.എസ്.പി. ജി. അജയ് നാഥ്, സബ് ഇന്‍സ്‌പെക്ടര്‍മാരായ പി.കെ. സുരേഷ്, രമേശന്‍, കെ. സജീവ്, എ.എസ്.ഐ.മാരായ ജി. സജീവ്, മനോജ് കുമാര്‍, എസ്.സി.പി.ഒ.മാരായ ജിഷാ മാധവന്‍, ബിജി ജോണ്‍, ചന്ദ്രബോസ്, ദിനില്‍ ദാമോദരന്‍, അഖില്‍, റിതേഷ് എന്നിവരാണുണ്ടായിരുന്നത്. കോലഞ്ചേരി കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.