ഇസ്രയേലില്‍ കോടികളുമായി മലയാളികള്‍ മുങ്ങി, പണം തട്ടിയത് പെര്‍ഫെക്ട് ചിട്ടിയുടെമറവില്‍; പരാതിയുമായി നിക്ഷേപകര്‍

ജറുസലേം: ഇസ്രയേലില്‍ 50 കോടി രൂപയുടെ ചിട്ടിത്തട്ടിപ്പ് നടത്തി മലയാളി ദമ്പതികള്‍ മുങ്ങിയതായി പരാതി. കണ്ണൂര്‍ സ്വദേശികളായ ലിജോ ജോര്‍ജ് ചിറക്കലും ഭാര്യ പാലമറ്റം ഹൗസില്‍ ഷൈനി ഷിനിലുമാണ് മലയാളികളില്‍ നിന്ന് പണം തട്ടി നാടുവിട്ടതെന്നാണ് പരാതിയില്‍ പറയുന്നത്. ഇതുമായി ബന്ധപ്പെട്ട് ജറുസലേം പോലീസിലും ഇസ്രയേലിലെ ഇന്ത്യന്‍ എംബസിക്കും കേരള പോലീസിലും പരാതി നല്‍കിയിട്ടുണ്ട്. ഇസ്രയേലില്‍ വര്‍ഷങ്ങളായി പെര്‍ഫെക്ട് ചിട്ടി എന്ന പേരില്‍ സ്ഥാപനം നടത്തി വരികയായിരുന്നു ഇവര്‍. 350ലേറെ പേരില്‍ നിന്ന് 2022 ഫെബ്രുവരി വരെ ഇവര്‍ പണം പിരിച്ചു കൊണ്ടിരുന്നതായാണ് പരാതിയില്‍ പറയുന്നത്. പലരില്‍ നിന്നായി ഇത്തരത്തില്‍ ഇവര്‍ 20 കോടിയിലേറെ രൂപ തട്ടിയെടുത്തിട്ടുണ്ടെന്ന് പരാതിക്കാര്‍ പറയുന്നു. വന്‍ വാഗ്ദാനങ്ങളായിരുന്നു ഇവര്‍ നല്‍കിയിരുന്നത് എന്നത് കൊണ്ട് തന്നെ പലരും ഇവരുടെ കെണിയില്‍ അകപ്പെടുകയായിരുന്നു. ഇവര്‍ പണം തട്ടിയെടുത്ത് ഇസ്രയേല്‍ വിട്ടതിന് ശേഷമാണ് പരാതിക്കാര്‍ വിവരമറിയുന്നത്. പണം നഷ്ടപ്പെട്ട പലരും നാട്ടിലേക്ക് മടങ്ങാനാകാതെ ഇസ്രയേലില്‍ കുടുങ്ങിക്കിടക്കുകയാണെന്നാണ് വിവരം.