സൊനാലിയുടെ ഭക്ഷണത്തില്‍ എന്തോ ചേര്‍ത്തു: കുടുംബം; ഭര്‍ത്താവിന്റെ മരണവും ദുരൂഹം

പനജി: ഹരിയാനയില്‍ നിന്നുള്ള ബിജെപി നേതാവും നടിയുമായ സൊനാലി ഫൊഗട്ട് (42) മരിച്ചതിന്റെ ഞെട്ടലിലാണു കുടുംബവും അനുയായികളും ആരാധകരും. ഗോവയില്‍ റസ്റ്ററന്റില്‍വച്ച് ശാരീരികാസ്വാസ്ഥ്യം വന്നതിനു പിന്നാലെയായിരുന്നു മരണം. ഹൃദയാഘാതമാണു മരണകാരണമെന്നു ഡോക്ടര്‍മാര്‍ അറിയിച്ചെങ്കിലും ദുരൂഹതയുണ്ടെന്നാണ് കുടുംബത്തിന്റെ ആരോപണം. ''റസ്റ്ററന്റില്‍നിന്നു ഭക്ഷണം കഴിച്ച ശേഷം സൊനാലിക്ക് അസ്വസ്ഥത അനുഭവപ്പെട്ടിരുന്നതായി കൂടെയുണ്ടായിരുന്ന ബിജെപി നേതാവ് അമ്മയോടു പറഞ്ഞിരുന്നു. ഭക്ഷണത്തില്‍ എന്തെങ്കിലും കലര്‍ത്തിയിരുന്നോ എന്നു ഞങ്ങള്‍ സംശയിക്കുന്നുണ്ട്. ആരെങ്കിലും ഗൂഢാലോചന നടത്തിയോ എന്നതും അന്വേഷിക്കണം'' സൊനാലിയുടെ സഹോദരി മാധ്യമങ്ങളോടു പറഞ്ഞു. എന്നാല്‍ സൊനാലിയുടെ മരണത്തില്‍ ദുരൂഹതയുണ്ടെന്ന ആരോപണം ഗോവ ഡിജിപി തള്ളിക്കളഞ്ഞു. ഗോവ മെഡിക്കല്‍ കോളജില്‍ മെഡിക്കല്‍ ബോര്‍ഡിന്റെ നേതൃത്വത്തില്‍ നടക്കുന്ന പോസ്റ്റ്‌മോര്‍ട്ടത്തിന്റെ റിപ്പോര്‍ട്ട് കിട്ടിയ ശേഷമേ കൂടുതലെന്തെങ്കിലും പറയാനാകൂ എന്നാണു പൊലീസിന്റെ നിലപാട്. ടിവി റിയാലിറ്റി ഷോ ബിഗ് ബോസില്‍ പങ്കെടുത്തതിലൂടെ പ്രശസ്തയായ സൊനാലി പിന്നീടാണു ബിജെപിയില്‍ ചേര്‍ന്നത്. 2019ലെ ഹരിയാന നിയമസഭാ തിരഞ്ഞെടുപ്പില്‍ ആദംപുര്‍ മണ്ഡലത്തില്‍ കോണ്‍ഗ്രസിലെ കുല്‍ദീപ് ബിഷ്‌ണോയിയോടു പരാജയപ്പെട്ടു. ബിഷ്‌ണോയി ഈയിടെ ബിജെപിയില്‍ ചേര്‍ന്നിരുന്നു. ടിക് ടോക് താരവുമായിരുന്ന സൊനാലിക്ക് ഇന്‍സ്റ്റഗ്രാമിലും വന്‍ ആരാധകനിരയുണ്ട്. മരിക്കുന്നതിന് ഏതാനും മണിക്കൂര്‍ മുന്‍പും ഇന്‍സ്റ്റഗ്രാം റീലും ഫോട്ടോകളും പോസ്റ്റ് ചെയ്തിരുന്നു. 'മദര്‍ഹുഡ്' എന്ന ഹിന്ദി സിനിമയില്‍ അഭിനയിച്ചിട്ടുണ്ട്. സൊനാലിയുടെ ഭര്‍ത്താവ് സഞ്ജയ് ഫൊഗറ്റിനെ 2016ല്‍ ദുരൂഹസാഹചര്യത്തില്‍ മരിച്ച നിലയില്‍ കണ്ടെത്തുകയായിരുന്നു.