മുസ്ലിം പെണ്‍കുട്ടിക്ക് 18 വയസ്സില്ലെങ്കിലും വിവാഹമാകാം, കേസില്ല: ഡല്‍ഹി ഹൈക്കോടതി

ന്യൂഡല്‍ഹി: മുസ്‌ലിം പെണ്‍കുട്ടികള്‍ ഋതുമതിയായാല്‍ വിവാഹമാകാമെന്ന് ഡല്‍ഹി ഹൈക്കോടതി. മുസ്‌ലിം വ്യക്തി നിയമപ്രകാരം വിവാഹത്തിന് പ്രായപൂര്‍ത്തിയാകണമെന്നില്ലെന്ന് കോടതി നിരീക്ഷിച്ചു. വിവാഹത്തിന് രക്ഷിതാക്കളുടെ അനുമതിയും ആവശ്യമില്ല. ഇത്തരം വിവാഹങ്ങളില്‍ ഭര്‍ത്താക്കന്‍മാര്‍ക്കെതിരെ പോക്‌സോ നിയമപ്രകാരം കേസെടുക്കാനാകില്ലെന്നും ഡല്‍ഹി ഹൈക്കോടതി അഭിപ്രായപ്പെട്ടു. ജസ്റ്റിസ് ജസ്മീത് സിങ്ങാണ് ഈ നിരീക്ഷണങ്ങള്‍ നടത്തിയത്. വിവാഹശേഷം പെണ്‍കുട്ടിക്ക് ഭര്‍ത്താവിനൊപ്പം കഴിയാന്‍ അവകാശമുണ്ട്. വിവാഹശേഷം ഭാര്യയും ഭര്‍ത്താവും തമ്മിലുള്ള ലൈംഗിക ബന്ധത്തില്‍ പോക്‌സോ നിയമപ്രകാരം കേസെടുക്കാനാകില്ലെന്നും കോടതി നിരീക്ഷിച്ചു. ബിഹാറില്‍ ഈ വര്‍ഷം മാര്‍ച്ച് 11ന് മുഹമ്മദീയ നിയമപ്രകാരം വിവാഹിതരായ ദമ്പതികളുടെ ഹര്‍ജിയിലാണ് ഹൈക്കോടതി ഇക്കാര്യം വ്യക്തമാക്കിയത്. 25 വയസ്സുള്ള യുവാവും 15 വയസ്സ് പിന്നിട്ട പെണ്‍കുട്ടിയുമാണ് ഹര്‍ജി നല്‍കിയത്. പെണ്‍കുട്ടിയുടെ വീട്ടുകാരുടെ എതിര്‍പ്പ് അവഗണിച്ചായിരുന്നു വിവാഹം. അതേസമയം, പെണ്‍കുട്ടിയുടെ അഭിഭാഷകന്‍ കോടതിയില്‍ സമര്‍പ്പിച്ച ആധാര്‍ കാര്‍ഡില്‍ പെണ്‍കുട്ടിക്ക് 19 വയസ്സാണ്. വിവാഹത്തിനു പിന്നാലെ ഗര്‍ഭിണിയായതോടെയാണ് പെണ്‍കുട്ടിയുടെ വീട്ടുകാര്‍ പൊലീസിനെ സമീപിച്ചത്. ഭര്‍ത്താവിനെതിരെ പോക്‌സോ നിയമപ്രകാരം കേസെടുക്കണമെന്നായിരുന്നു ആവശ്യം.