ശസ്ത്രക്രിയ നടത്താന്‍ കൈക്കൂലി വാങ്ങിയ ഡോക്ടര്‍ കോട്ടയത്ത് വിജിലന്‍സിന്റെ പിടിയില്‍

കോട്ടയം: കാഞ്ഞിരപ്പള്ളി താലൂക്ക് ആശുപത്രിയിലെ ഡോക്ടര്‍ കൈക്കൂലി വാങ്ങുന്നതിനിടെ അറസ്റ്റില്‍ . ശസ്ത്രക്രിയ നടത്താനായി രോഗിയുടെ ബന്ധുവില്‍ നിന്ന് കൈക്കൂലി വാങ്ങുന്നതിനിടെ ആയിരുന്നു അറസ്റ്റ്. കാഞ്ഞിരപ്പള്ളി താലൂക്ക് ആശുപത്രിയിലെ സര്‍ജന്‍ ഡോക്ടര്‍ എം.എസ്.സുജിത് കുമാറാണ് വിജിലന്‍സിന്റെ പിടിയിലായത്. മുണ്ടക്കയം സ്വദേശിയായ രോഗിയ്ക്ക് ഹെര്‍ണിയ ശസ്ത്രക്രിയ നടത്താനാണ് സുജിത് കുമാര്‍ അയ്യായിരം രൂപ കൈക്കൂലി ആവശ്യപ്പെട്ടത്. ആദ്യ ഗഡുവായി ഈ മാസം പതിനഞ്ചിന് രണ്ടായിരം രൂപ വാങ്ങി. തുടര്‍ന്ന് പതിനെട്ടാം തീയതി ശസ്ത്രക്രിയ നടത്തി. പിന്നീട് ബാക്കി തുക നല്‍കണമെന്ന് ആവശ്യപ്പെട്ടതോടെയാണ് രോഗിയുടെ ബന്ധുക്കള്‍ പരാതിയുമായി വിജിലന്‍സിനെ സമീപിച്ചത്. വിജിലന്‍സ് നിര്‍ദ്ദേശപ്രകാരം രോഗിയുടെ മകന്‍ ഇന്ന് വൈകുന്നേരം അഞ്ചരയോടെ ബാക്കി നല്‍കാനുള്ള മൂവായിരം രൂപയുമായി ഡോക്ടര്‍ സുജിത് കുമാറിന്റെ വീട്ടിലെത്തി. ഡോക്ടര്‍ കൈക്കൂലി വാങ്ങുമ്പോള്‍ വീടിനു സമീപം ഒളിച്ചിരിക്കുകയായിരുന്ന വിജിലന്‍സ് സംഘം കയ്യോടെ പിടികൂടുകയായിരുന്നു.കോട്ടയം വിജിലന്‍സ് എസ്.പി പി.ജി. വിനോദ് കുമാറിന്റെ നിര്‍ദ്ദേശാനുസരണം വിജിലന്‍സ് റേഞ്ച് ഡി.വൈ.എസ്.പി പി.വി മനോജ് കുമാറിന്റെ നേതൃത്വത്തിലുള്ള ഉദ്യോഗസ്ഥരാണ് ഡോക്ടറെ കുടുക്കിയത്.