കവര്‍ച്ചപ്പണം പാവങ്ങള്‍ക്കും; ഡല്‍ഹിയിലെ ‘കായംകുളം കൊച്ചുണ്ണി’ പിടിയില്‍

ന്യൂഡല്‍ഹി ആഡംബര വീടുകളില്‍ മോഷണം നടത്തുന്ന ഡല്‍ഹിയിലെ 'കായംകുളം കൊച്ചുണ്ണി' അറസ്റ്റില്‍. ധനികര്‍ താമസിക്കുന്ന സ്ഥലങ്ങളിലെ വീടുകളില്‍ മോഷണം നടത്തുന്ന ലംബു എന്നറിയപ്പെടുന്ന വസീം അക്രം (27) ആണ് പിടിയിലായത്. ഇരുപത്തിയഞ്ചോളം വരുന്ന കൊള്ളസംഘത്തിന്റെ േനതാവാണ് ഇയാളെന്ന് പൊലീസ് പറഞ്ഞു. മോഷ്ടിക്കുന്ന തുകയില്‍നിന്ന് ഒരു ഭാഗം പാവപ്പെട്ടവര്‍ക്ക് നല്‍കുന്നതിനാല്‍ ഇയാള്‍ക്ക് നിരവധി ആരാധകരും അനുയായികളുമുണ്ട്. അതിനാല്‍, പൊലീസ് വരികയാണെങ്കില്‍ വിവരം ഇയാള്‍ക്ക് വളരെ എളുപ്പത്തില്‍ ലഭിച്ചിരുന്നു. മോഷണത്തിനുശേഷം പല സംസ്ഥാനങ്ങളിലായി ഒളിവില്‍ കഴിയുകയാണ് രീതി. കൊലപാതകശ്രമം, കവര്‍ച്ച, ലൈംഗികപീഡനം തുടങ്ങി 160 കേസുകളില്‍ ഇയാള്‍ പ്രതിയാണ്. വസീമിനെ പിടികൂടാനായി ഇന്‍സ്‌പെക്ടര്‍ ശിവ് കുമാറിന്റെ നേതൃത്വത്തില്‍ പ്രത്യേക സംഘത്തെ രൂപീകരിച്ചു. നാല് മാസത്തെ അന്വേഷണത്തിനൊടുവിലാണ് പിടികൂടാനായത്. ആനന്ദ് വിഹാര്‍ റെയില്‍വേ സ്റ്റേഷനില്‍ നിന്നാണ് വസീമിനെ കസ്റ്റഡിയിലെടുത്തത്. തോക്കും വെടിയുണ്ടകളും ഇയാളില്‍നിന്നു പിടിച്ചെടുത്തെന്നും പൊലീസ് അറിയിച്ചു.