ഗുരുവായൂര്‍ കോണ്‍ഗ്രസില്‍ ഭിന്നത; ടി എന്‍ പ്രതാപന്‍ പ്രസംഗിച്ചുകൊണ്ടിരിക്കെ മുദ്രാവാക്യം വിളികളുമായി പ്രവര്‍ത്തകര്‍

കോണ്‍ഗ്രസ് വടക്കേക്കാട്, ഗുരുവായൂര്‍ ബ്ലോക്ക് കമ്മിറ്റികള്‍ രാഹുല്‍ ഗാന്ധി നായിക്കുന്ന ഭാരത് ജോഡോ യാത്ര വിജയിപ്പിക്കുന്നതിന് വേണ്ടി സംഘടിപ്പിച്ച സംയുക്ത കണ്‍വെന്‍ഷനില്‍ നാടകീയ രംഗങ്ങള്‍. ടി എന്‍ പ്രതാപന്‍ എംപി പ്രസംഗിച്ചു കൊണ്ടിരിക്കെ ഒരു വിഭാഗം കോണ്‍ഗ്രസ് പ്രവര്‍ത്തകര്‍ മുദ്രാവാക്യം വിളികളുമായി യോഗ ഹാളിലേക്കെത്തി. പുന്നയൂര്‍ക്കുളം, അണ്ടത്തോട് മേഖലകളില്‍ നിന്നുള്ള നേതാക്കളാണ് പ്രതിഷേധവുമായെത്തിയത്. മേഖല പ്രസിഡന്റുമാരെ തെരഞ്ഞെടുത്തതില്‍ നേതൃത്വം നീതിപൂര്‍വ്വമായ സമീപനം കൈകൊണ്ടില്ലെന്ന് ആരോപിച്ചായിരുന്നു പ്രതിഷേധം. യോഗത്തിനെത്തിയവരും പ്രതിഷേധക്കാരും തമ്മില്‍ വാക്കുതര്‍ക്കമുണ്ടായി. വാക്കേറ്റം തുടര്‍ന്നതോടെ കണ്‍വെന്‍ഷന്‍ അവസാനിപ്പിക്കുന്നതായി നേതാക്കള്‍ അറിയിച്ചു. ടി എന്‍ പ്രതാപന്‍ എംപിയെ കൂടാതെ ഡി സി സി പ്രസിഡന്റ് ജോസ് വള്ളൂരും വേദിയിലുണ്ടായിരുന്നു. കെപിസിസി, ഡിസിസി നേതാക്കള്‍, നിയോജകമണ്ഡലത്തിലെ രണ്ടുബ്ലോക്കുകളായ ഗുരുവായൂര്‍, വടക്കേക്കാട് ബ്ലോക്കുകളുടെ ഭാരവാഹികള്‍, എക്‌സിക്യൂട്ടീവ് അംഗങ്ങള്‍, മണ്ഡലം പ്രസിഡന്റുമാര്‍, ഭാരവാഹികള്‍, ബൂത്ത് പ്രസിഡന്റുമാര്‍, പോഷക സംഘടനകളുടെ സംസ്ഥാന ജില്ല ബ്ലോക്ക് ഭാരവാഹികള്‍, കോണ്‍?ഗ്രസ് ജനപ്രതിനിധികള്‍, യൂത്ത് കോണ്‍ഗ്രസ്, കര്‍ഷക കോണ്‍ഗ്രസ്, സേവാദള്‍, ന്യൂനപക്ഷ, ഐഎന്‍ടിയുസി, മഹിളാ കോണ്‍ഗ്രസ്, പ്രവാസി കോണ്‍ഗ്രസ് തുടങ്ങിയ പോഷകസംഘടനകളുടെ നേതാക്കളെയും ഭാരവാഹികളെയുമാണ് യോ?ഗത്തിന് ക്ഷണിച്ചിരുന്നത്.