ഒരു വര്‍ഷത്തിനിടെ ഇറ്റലിയില്‍ കൊല്ലപ്പെട്ടത് 125 സ്ത്രീകള്‍; വില്ലന്‍മാര്‍ പങ്കാളികള്‍

റോം: കഴിഞ്ഞ ഒരു വര്‍ഷത്തിനിടെ ഇറ്റലിയില്‍ 125 സ്ത്രീകള്‍ കൊല്ലപ്പെട്ടതായി കണക്കുകള്‍. ഇറ്റലിയിലെ സ്ത്രീഹത്യകളുടെ എണ്ണം കഴിഞ്ഞ 12 മാസത്തിനിടെ 15 ശതമാനത്തിലധികമായി വര്‍ധിച്ചുവെന്നും ഇറ്റാലിയന്‍ ആഭ്യന്തര മന്ത്രാലയം പുറത്തുവിട്ട കണക്കുകള്‍ പറയുന്നു. 2021 ഓഗസ്റ്റ് ഒന്നിനും 2022 ജൂലൈ 31നും ഇടയിലാണ് രാജ്യത്ത് 125 സ്ത്രീകള്‍ കൊല്ലപ്പെട്ടത്. ഓരോ മൂന്നു ദിവസത്തിലും ഒരു സ്ത്രീവീതം കൊല്ലപ്പെടുന്നതിന് തുല്യമാണ് ഈ ഞെട്ടിക്കുന്ന കണക്കുകള്‍. തൊട്ടു മുന്‍പുള്ള 12 മാസങ്ങളില്‍ 108 സ്ത്രീകള്‍ കൊല്ലപ്പെട്ടു. മുന്‍വര്‍ഷത്തെ അപേക്ഷിച്ച് 15.7 ശതമാനം വര്‍ധനവാണിത്. സ്ത്രീകള്‍ക്കെതിരായ അതിക്രമങ്ങള്‍ക്കെതിരെ ഇറ്റലി നിരവധി പദ്ധതികള്‍ ആവിഷ്‌കരിച്ചു നടപ്പാക്കുന്നുണ്ടെങ്കിലും കൊലപാതകങ്ങളുടെ എണ്ണം വര്‍ധിക്കുന്നത് അധികൃതര്‍ ആശങ്കയിടെയാണ് കാണുന്നത്. കഴിഞ്ഞവര്‍ഷം നടന്ന 125 പെണ്‍കൊലപാതകങ്ങളില്‍ 108 എണ്ണവും കുടുംബ ബന്ധങ്ങളുടെ പശ്ചാത്തലത്തിലുള്ളതാണ്. 68 സ്ത്രീകളെ അവരുടെ പങ്കാളിയോ മുന്‍ പങ്കാളിയോ ആണ് വകവരുത്തിയത്. കഴിഞ്ഞ വര്‍ഷം ഇറ്റലിയില്‍ കൊലപാതകങ്ങളുടെ മൊത്തത്തിലുള്ളഎണ്ണത്തിലും വര്‍ധനവുണ്ടായി. 319 കൊലപാതകങ്ങളാണ് കഴിഞ്ഞവര്‍ഷം രാജ്യത്ത് നടന്നത്. തൊട്ടുമുന്‍പുള്ള 12 മാസങ്ങളില്‍ കൊലപാതകങ്ങളുടെ എണ്ണം 276 ആയിരുന്നു. ഇതിന്റെ 39.2 ശതമാനവും സ്ത്രീഹത്യകളാണെന്നും ആഭ്യന്തര മന്ത്രാലയത്തിന്റെ കണക്കുകള്‍ വ്യക്തമാക്കുന്നു.