19 കാരിക്ക് മയക്കുമരുന്ന് കലര്‍ത്തിയ പാനീയം നല്‍കി കൂട്ടബലാത്സംഗം ചെയ്തു; മൂന്ന് യുവാക്കള്‍ അറസ്റ്റില്‍

ഗാസിയാബാദ് ജില്ലയിലെ മോദി നഗര്‍ പട്ടണത്തില്‍ പിറന്നാള്‍ പാര്‍ട്ടിക്ക് ശേഷം 19 കാരിയെ മൂന്ന് യുവാക്കള്‍ ബലാത്സംഗം ചെയ്തു. ഒരു സ്വകാര്യ കമ്പനിയില്‍ ജോലി ചെയ്യുന്ന സ്ത്രീ ഞായറാഴ്ച പാര്‍ട്ടിയില്‍ പങ്കെടുക്കുന്നതിനിടെ മയക്കുമരുന്ന് കലര്‍ത്തിയ പാനീയം നല്‍കിയെന്ന് ആക്രമിക്കപ്പെട്ട പെണ്‍കുട്ടി പറഞ്ഞു. പിന്നീട് ഒരാള്‍ മുറിയിലേക്ക് കൊണ്ടുപോയെന്നും സുഹൃത്തുക്കളെ വിളിച്ചുവരുത്തി അവര്‍ മാറിമാറി തന്നെ ബലാത്സംഗം ചെയ്തുവെന്നും പെണ്‍കുട്ടി പൊലീസിന് മൊഴി നല്‍കി. അല്‍പം ബോധം തിരിച്ച് കിട്ടിയപ്പോള്‍ തന്നെ മര്‍ദിച്ചുവെന്നും ആരോടെങ്കിലും പറഞ്ഞാല്‍ കൊന്നുകളയുമെന്ന് ഭീഷണിപ്പെടുത്തിയെന്നും പെണ്‍കുട്ടി പൊലീസിന് മൊഴി നല്‍കി. സംഭവ സ്ഥലത്തു നിന്ന് രക്ഷപ്പെട്ട പെണ്‍കുട്ടി പിന്നീട് വീട്ടിലെത്തി തനിക്ക് നേരിട്ട ദുരനുഭവം വീട്ടുകാരെ അറിയിച്ചു. തിങ്കളാഴ്ച്ച പെണ്‍കുട്ടി പിതാവിനൊപ്പം മോദി നഗര്‍ പൊലീസ് സ്റ്റേഷനിലെത്തി പരാതി നല്‍കി. പൊലീസ് കേസ് ഫയല്‍ ചെയ്തു. പെണ്‍കുട്ടിയെ വൈദ്യപരിശോധന നടത്തിയതോടെ കൂട്ടബലാത്സംഗം നടന്നതായി സ്ഥിരീകരിച്ചു. ശേഖര്‍, കൃഷ്ണ, അര്‍ജുന്‍ എന്നീ മൂന്ന് പ്രതികളെയും അറസ്റ്റ് ചെയ്തതായി റൂറല്‍ അഡീഷണല്‍ പൊലീസ് സൂപ്രണ്ട് പറഞ്ഞു.