റിട്ട. അധ്യാപികയുടെ വീട്ടില്‍നിന്ന് മൂന്നുലക്ഷം കവര്‍ന്ന അയല്‍വാസി അറസ്റ്റില്‍

പൊന്‍കുന്നം: റിട്ട. അധ്യാപികയുടെ വീട്ടില്‍നിന്ന് മൂന്നുലക്ഷം രൂപ മോഷ്ടിച്ച കേസില്‍ കൂലിപ്പണിക്ക് പതിവായി എത്തിയിരുന്ന അയല്‍വാസി അറസ്റ്റില്‍. ചിറക്കടവ് പറപ്പള്ളിത്താഴെ കുഴിമറ്റത്ത് വീട്ടില്‍ വാടകക്ക് താമസിക്കുന്ന കെ.ആര്‍. രാജേഷിനെയാണ് (രാജന്‍ -53) പൊന്‍കുന്നം പൊലീസ് അറസ്റ്റ് ചെയ്തത്.മൂന്നുലക്ഷം രൂപ ഇയാളുടെ വീട്ടില്‍നിന്ന് പൊലീസ് കണ്ടെടുത്തു. ചിറക്കടവ് മണക്കാട്ട് അമ്പലത്തിന് സമീപം പോറട്ടൂര്‍ ചെല്ലമ്മയുടെ വീട്ടിലാണ് മോഷണം നടത്തിയത്. 84കാരിയായ ഇവര്‍ ഒറ്റക്കാണ് താമസിക്കുന്നത്. ഇവരുടെ കിടപ്പുമുറിയിലെ ബക്കറ്റില്‍ സൂക്ഷിച്ചിരുന്ന പണമാണ് രാജേഷ് മോഷ്ടിച്ചത്. ഇയാള്‍ പതിവായി ചെല്ലമ്മയുടെ പക്കല്‍നിന്ന് പണം കടം വാങ്ങിയിരുന്നു. കഴിഞ്ഞദിവസം പണം ചോദിച്ചപ്പോള്‍ നല്‍കിയില്ല. ഇതേ തുടര്‍ന്നാണ് പണം സൂക്ഷിക്കുന്നത് ബക്കറ്റിലാണെന്ന് ബോധ്യമുള്ള ഇയാള്‍ മുറിയില്‍കയറി മോഷ്ടിച്ചത്. ഇയാള്‍ ഏറെനേരം വീട്ടില്‍ തങ്ങുകയും ചെല്ലമ്മ അടുക്കളയിലേക്ക് പോയ തക്കംനോക്കി പണമെടുത്ത് ഓടുകയുമായിരുന്നു. സംഭവം ശ്രദ്ധയില്‍പെട്ട ചെല്ലമ്മ പൊന്‍കുന്നം പൊലീസില്‍ പരാതി നല്‍കി. വിരലടയാള വിദഗ്ധര്‍ തെളിവുശേഖരിച്ചു.