സിനിമയിലെ ക്ലൈമാക്‌സ് അനുകരിച്ചു; 20 ലീറ്റര്‍ പെട്രോള്‍ ശരീരത്തിലൊഴിച്ച് കത്തിച്ച് യുവാവ് ജീവനൊടുക്കി

ബെംഗളൂരു: തെലുങ്ക് ചിത്രമായ അരുന്ധതിയിലെ ആത്മാഹുതി രംഗം അനുകരിച്ച് കര്‍ണാടകയില്‍ 23 വയസ്സുകാരന്‍ ആത്മഹത്യ ചെയ്തു. കര്‍ണാടകയിലെ തുമാകുരു സ്വദേശിയായ രേണുക പ്രസാദ് ആണ് മരിച്ചത്. 15 തവണയെങ്കിലും യുവാവ് ഈ ചിത്രം കണ്ടിട്ടുണ്ടാകുമെന്നാണു വിവരമെന്നു പൊലീസ് പറയുന്നു. സിനിമകളോടുള്ള അമിതമായ ഭ്രമമായിരുന്നു യുവാവിന്. പതിനൊന്നാം ക്ലാസില്‍ ഇയാള്‍ പഠനം നിര്‍ത്തിയിരുന്നു. സിനിമയിലെ കഥാപാത്രത്തെ പോലെ 20 ലീറ്റര്‍ പെട്രോള്‍ ശരീരത്തിലൊഴിച്ച് തീകൊളുത്തുകയായിരുന്നു. വഴിയാത്രക്കാരാണ് ഇയാളെ ആശുപത്രില്‍ എത്തിച്ചത്. 60 ശതമാനത്തോളം ഇയാള്‍ക്ക് പൊള്ളലേറ്റിരുന്നു. പിറ്റേദിവസം മരിച്ചു. പത്താംക്ലാസ് വരെ പഠനത്തില്‍ അസാധാരണമായ മികവു പുലര്‍ത്തിയിരുന്ന വിദ്യാര്‍ഥിയായിരുന്നു രേണുക പ്രസാദെന്ന് ബന്ധുക്കള്‍ പറയുന്നു. അരുന്ധതി സിനിമയിലെ ആത്മാഹുതി രംഗങ്ങള്‍ അനുകരിക്കുന്നതിനെക്കുറിച്ച് നേരത്തെ തന്നെ മാതാപിതാക്കളോട് യുവാവ് സംസാരിച്ചിരുന്നതായും പൊലീസ് പറയുന്നു.