പ്രണയബന്ധമുണ്ടെന്ന് സംശയം; അമ്മയെ കുത്തിക്കൊന്ന് മൃതദേഹം ഒളിപ്പിച്ച മകന്‍ അറസ്റ്റില്‍

ഗുരുഗ്രാം: പ്രണയബന്ധമുണ്ടെന്ന സംശയത്താല്‍ അമ്മയെ മകന്‍ കുത്തിക്കൊന്നു. ഹരിയാനയിലെ ഹിസാറിലാണു വിധവയായ സ്ത്രീയെ മകന്‍ ക്രൂരമായി കൊലപ്പെടുത്തിയത്. സോന ദേവി (40) കൊല്ലപ്പെട്ട കേസില്‍ മകന്‍ പ്രവേഷിനെ (21) അറസ്റ്റ് ചെയ്തതായും പ്രതി കുറ്റം സമ്മതിച്ചതായും പൊലീസ് അറിയിച്ചു. ഭര്‍ത്താവ് മരിച്ചതിനെ തുടര്‍ന്നു സ്വദേശമായ ഹിസാറിലെ ഗാര്‍ഹിയിലേക്കു മടങ്ങിയ സോന, ഗ്രാമത്തിലെ സ്വകാര്യ സ്‌കൂളില്‍ വാര്‍ഡനായി ജോലി ചെയ്യുകയായിരുന്നു. ആറു മാസം മുന്‍പു ജോലി ഉപേക്ഷിച്ചു. ഇതേ ഗ്രാമത്തില്‍ വാടകയ്ക്കു മുറിയെടുത്താണു കഴിഞ്ഞിരുന്നത്. സോനിപത്തിലെ ജാട്ട്വാഡാ മൊഹല്ലയില്‍ താമസിച്ചിരുന്ന മകന്‍ പ്രവേഷ് അമ്മയെ കാണാന്‍ ഇടയ്ക്കിടെ വരാറുണ്ട്. ഓഗസ്റ്റ് ആറിന് കാണാനെത്തിയപ്പോഴാണ് ഇയാള്‍ അമ്മയെ നിരവധിതവണ കുത്തിയത്. പരുക്കേറ്റ് അവശയായ അമ്മയെ ശ്വാസംമുട്ടിച്ചു മരണം ഉറപ്പാക്കുകയും ചെയ്തു. സംഭവം ആരും അറിയാതിരിക്കാനായി മൃതദേഹം കട്ടിലിനടിയില്‍ ഒളിപ്പിച്ചു. മുറിയില്‍നിന്നു ദുര്‍ഗന്ധം വരുന്നെന്ന് ഉടമ പരാതിപ്പെട്ടതിനെ തുടര്‍ന്നു പൊലീസ് നടത്തിയ പരിശോധനയിലാണു കൊലപാതകവിവരം പുറത്തറിഞ്ഞത്. 4 ദിവസത്തിനുശേഷം ഇക്കഴിഞ്ഞ ബുധനാഴ്ച കണ്ടെത്തുമ്പോള്‍ സോനയുടെ മൃതദേഹം അഴുകിയ നിലയിലായിരുന്നു. സോനയുടെ സഹോദരന്‍ പര്‍വീന്ദറാണു സംഭവത്തില്‍ പ്രവേഷിനെ സംശയമുണ്ടെന്നു പൊലീസിനോടു പറഞ്ഞത്. വ്യാഴാഴ്ച റോത്തക്കില്‍നിന്ന് ഇയാളെ പിടികൂടി. അമ്മയ്ക്ക് ഒരാളുമായി അടുപ്പമുണ്ടെന്നും ഫോണില്‍ സംസാരിക്കുന്നതു പലതവണ കണ്ടിട്ടുണ്ടെന്നും ഇതാണു കൊലപാതകത്തിലേക്കു നയിച്ചതെന്നും പ്രതി പൊലീസിനു മൊഴി നല്‍കി.