‘ആ മോളെ വീട്ടില്‍ പോയി കണ്ടു, പ്രശ്‌നപരിഹാരത്തിന് നിര്‍ദേശം നല്‍കി…’; വീണ്ടും കലക്ടര്‍

ആലപ്പുഴ: കലക്ടര്‍ മാമന്റെ സഹായം തേടി സമൂഹമാധ്യമത്തില്‍ സന്ദേശമയച്ച കൊച്ചുമിടുക്കിയുടെ പ്രശ്‌നം കേള്‍ക്കാന്‍ നേരിട്ട് വീട്ടിലെത്തി ആലപ്പുഴ കലക്ടര്‍ കൃഷ്ണ തേജ. തന്റെ ഔദ്യോഗിക ഫെയ്‌സ്ബുക്ക് പേജിലൂടെ കലക്ടര്‍ തന്നെയാണ് ഇക്കാര്യം വെളിപ്പെടുത്തിയത്. മാരാരിക്കുളം സ്വദേശിയായ മീനാക്ഷി എന്ന പെണ്‍കുട്ടിയാണ് സെറിബ്രല്‍ പാള്‍സി ബാധിച്ച തന്റെ സഹോദരിക്കുവേണ്ടി കലക്ടറോട് സഹായം അഭ്യര്‍ഥിച്ചത്. വീടിനടുത്ത് പ്രവര്‍ത്തിക്കുന്ന തടിയറപ്പ് മില്ലില്‍ നിന്നുള്ള മലിനീകരണം സുഖമില്ലാതെ കിടക്കുന്ന ചേച്ചിക്ക് ആരോഗ്യപ്രശ്‌നങ്ങള്‍ സൃഷ്ടിച്ചപ്പോഴാണ് മീനാക്ഷി സഹായം തേടിയത്. 2019ല്‍ കൃഷ്ണ തേജ സബ് കലക്ടര്‍ ആയിരിക്കുന്ന കാലത്ത് മീനാക്ഷിയും കുടുംബവും ഇതേ പരാതി നല്‍കിയിരുന്നു. അന്ന് മലിനീകരണ നിയന്ത്രണ ബോര്‍ഡിനും മാരാരിക്കുളം പഞ്ചായത്തിനും വിഷയത്തില്‍ അന്വേഷണം നടത്താന്‍ നിര്‍ദേശം നല്‍കിയെങ്കിലും കൃഷ്ണതേജ സ്ഥലം മാറിപ്പോയതോടെ ഇക്കാര്യത്തില്‍ തുടര്‍ നടപടികളൊന്നും ഉണ്ടായില്ല. ഇപ്പോള്‍ വീണ്ടും അദ്ദേഹം കലക്ടര്‍ ആയി ആലപ്പുഴയില്‍ മടങ്ങിവന്നതോടെയാണ് മീനാക്ഷി വീണ്ടും സഹായം അഭ്യര്‍ഥിച്ചത്. 'കഴിഞ്ഞ ദിവസങ്ങളില്‍ എനിക്ക് ഫെയ്‌സ്ബുക്കില്‍ മെസേജായും കമന്റായും ഈ മോള്‍ ഒരു സഹായം ചോദിച്ചിരുന്നു. ഇന്ന് ഞാനീ മോളെ വീട്ടില്‍ പോയി കണ്ടു. ഇവരുടെ ആവശ്യങ്ങള്‍ ചോദിച്ച് മനസ്സിലാക്കി. ഇവരുടെ പ്രശ്‌ന പരിഹാരത്തിനാവശ്യമായ നടപടികള്‍ സ്വീകരിക്കാന്‍ സബ് കലക്ടര്‍ക്ക് നിര്‍ദേശം നല്‍കി.' -കലക്ടര്‍ കുറിച്ചു.