ലഹരിക്കെണിയില്‍ കുട്ടികള്‍; തടയാന്‍ പ്രത്യേക പദ്ധതിയുമായി എക്‌സൈസ്

ലഹരിക്കെനിയില്‍ കുട്ടികള്‍ പെടുന്നത് തടയാന്‍ പ്രത്യേക പദ്ധതിയുമായി എക്‌സൈസ് വകുപ്പ്. ലഹരിക്കടത്ത് തടയാനായി സ്‌പെഷ്യല്‍ ഡ്രൈവിനു തുടക്കമിട്ടതായി കണ്ണൂര്‍ എക്‌സൈസ് അസിസ്റ്റന്റ് കമ്മീഷണര്‍ ടി രാകേഷ് പറഞ്ഞു. സ്‌കൂളുകള്‍ കേന്ദ്രീകരിച്ച് ക്യാമ്പയിനുകള്‍ ശക്തമാക്കും. കണ്ണൂര്‍ ലഹരിക്കെണിയില്‍ ഇരയായ പെണ്‍കുട്ടിയുടെ വെളിപ്പെടുത്തലില്‍ കൂടുതല്‍ പരിശോധന നടത്തുമെന്ന് അസിസ്റ്റന്റ് കമ്മീഷണര്‍ വ്യക്തമാക്കി. ലഹരി നല്‍കി സഹപാഠി വിദ്യാര്‍ത്ഥിനിയെ പീഡിപ്പിച്ച കേസില്‍ പൊലീസിനെതിരെ ഇരയായ പെണ്‍കുട്ടിയുടെ കുടുംബം രംഗത്തുവന്നിരുന്നു. കേസ് വഴിതിരിച്ചുവിടാന്‍ പൊലീസ് ശ്രമിക്കുന്നു എന്ന് കുടുംബം ആരോപിച്ചു. തെളിവുകളുള്ള മൊബൈല്‍ ഫോണ്‍ പരിശോധിക്കാന്‍ പൊലീസ് തയ്യാറായില്ല. മകളെ പൊലീസ് സ്റ്റേഷനിലേക്ക് അനാവശ്യമായി വിളിച്ചുവരുത്തി. പൊലീസ് നടപടി മകള്‍ക്ക് മാനസിക സമ്മര്‍ദ്ദം ഉണ്ടാക്കിയെന്നും പെണ്‍കുട്ടിയുടെ കുടുംബം പറഞ്ഞു. മകള്‍ക്ക് സുരക്ഷ ഉറപ്പാക്കണമെന്നാണ് ഇവരുടെ ആവശ്യം. തങ്ങളുടെ സ്വകാര്യ ജീവിതത്തിലേക്ക് അവര്‍ കേസ് വലിച്ചുകൊണ്ടുവരികയാണ് എന്ന് മാതാപിതാക്കള്‍ പറയുന്നു. കേസിന് ആസ്പദമായ എല്ലാ തെളിവുകളും നല്‍കിയിട്ടുണ്ട്. മറ്റ് ഏഴ് പെണ്‍കുട്ടികളുമായി തന്റെ മകള്‍ ബന്ധപ്പെട്ടത് പ്രതിയുടെ ഫോണില്‍ നിന്നാണ് എന്നും മാതാപിതാക്കള്‍ പ്രതികരിച്ചു. പ്രായപൂര്‍ത്തിയാവാത്ത ഒരു അതിജീവിതയെ പൊലീസ് സ്റ്റേഷനിലേക്ക് സാധാരണ ഗതിയില്‍ വിളിച്ചുവരുത്താറില്ല. എന്നാല്‍, ഇവിടെ 9ആം ക്ലാസുകാരിയായ പെണ്‍കുട്ടിയെ മൊഴിയെടുക്കാനായി സ്റ്റേഷനിലേക്ക് വിളിച്ചുവരുത്തി. ഇത് തന്നെ അസാധാരണമാണ്. കേസ് വഴിതിരിച്ചുവിടാന്‍ ശ്രമമുണ്ടെന്നും ആരോപണമുണ്ട്. മൊബൈല്‍ ഫോണുകളുമായി ബന്ധപ്പെട്ട് അന്വേഷണം നടത്താന്‍ പൊലീസ് തയ്യാറാവുന്നില്ല. ആരോപണവിധേയരിലേക്ക് അന്വേഷണം കൊണ്ടുപോകാന്‍ പൊലീസ് ശ്രമം നടത്തുന്നില്ല. പരാതി നല്‍കിയതിനു പിന്നാലെ തനിക്ക് ഭീഷണി ഫോണ്‍ കോള്‍ ലഭിച്ചിരുന്നെന്ന് പെണ്‍കുട്ടിയുടെ പിതാവ് നേരത്തെ വെളിപ്പെടുത്തിയിരുന്നു. ഇതുമായി ബന്ധപ്പെട്ട അന്വേഷണവും നടക്കുന്നില്ല എന്നും മാതാപിതാക്കള്‍ പ്രതികരിച്ചു. പല പ്രായത്തിലുള്ള 11 പെണ്‍കുട്ടികള്‍ക്ക് ലഹരി എത്തിക്കുന്നത് പ്രായപൂര്‍ത്തിയാകാത്ത പയ്യനാണെന്ന് പീഡനത്തിന് ഇരയായ ഒമ്പതാംക്ലാസുകാരി വെളിപ്പെടുത്തിയിരുന്നു. കണ്ണൂര്‍ സിറ്റിയിലെ ഏറ്റവും വലിയ ലഹരി ഡീലര്‍മാരില്‍ ഒരാളാണ് ഈ പയ്യനെന്ന് പെണ്‍കുട്ടിയുടെ പിതാവ് വെളിപ്പെടുത്തുന്നു. തനിക്ക് കഞ്ചാവ് മാത്രമേ നല്‍കിയിട്ടുള്ളൂ എന്നും എന്നാല്‍ ചേച്ചിമാര്‍ക്ക് എം.ഡി.എം.എ, എല്‍.എസ്.ഡി സ്റ്റാമ്പ് തുടങ്ങിയവ നല്‍കി പീഡിപ്പിക്കുന്നുണ്ടെന്നും പെണ്‍കുട്ടി പറയുന്നു. പലപ്പോഴും ലഹരി ഉപയോഗിച്ച ശേഷം പെണ്‍കുട്ടികളുടെ കൂടെയാണ് അവന്‍ രാത്രി കഴിയാറ്. പീഡന ദൃശ്യങ്ങള്‍ ചിത്രീകരിച്ച് ബ്ലാക്ക് മെയില്‍ ചെയ്യാനായി ഉപയോഗിക്കുന്നുണ്ട്. ഇത്തരത്തില്‍ തന്നെക്കൊണ്ട് കഞ്ചാവ് വലിപ്പിക്കുന്ന ദൃശ്യങ്ങളും എടുത്തിട്ടുണ്ട്. ഇതിന് ശേഷമാണ് ബ്ലാക്ക്മെയില്‍ ചെയ്യുന്നതെന്ന് പെണ്‍കുട്ടി വെളിപ്പെടുത്തുന്നു.