ഷൂട്ടിംഗിനിടെ അപകടം; ശില്‍പ ഷെട്ടിയ്ക്ക് പരുക്ക്

ഷൂട്ടിംഗിനിടെ ബോളിവുഡ് താരം ശില്‍പ ഷെട്ടിയ്ക്ക് പരുക്ക്. നടിയുടെ ഇടത് കാല്‍ ഒടിഞ്ഞു. പുതിയ ചിത്രം 'ഇന്ത്യന്‍ പൊലീസ് ഫോഴ്സിന്റെ' ഷൂട്ടിംഗ് വേളയിലാണ് താരത്തിന് പരുക്കേറ്റത്. ഇന്‍സ്റ്റഗ്രാമിലൂടെ നടി തന്നെയാണ് അപകടവിവരം പുറത്തറിയിച്ചത്. റോള്‍ ക്യാമറ ആക്ഷന്‍ എന്ന് പറഞ്ഞതും തന്റെ കാല് ഒടിഞ്ഞെന്ന് ശില്‍പ്പ ഷെട്ടി ഇന്‍സ്റ്റഗ്രാമില്‍ കുറിച്ചു. ആറ് ആഴ്ചത്തേക്ക് ഇനി ഒരു ആക്ഷനും ഉണ്ടാകില്ല. എത്രയും വേഗം കൂടുതല്‍ ശക്തയായി തിരിച്ചുവരും. അത്രയും കാലം പ്രാര്‍ത്ഥനകള്‍ ഉണ്ടാകണമെന്നും ശില്‍പ ഷെട്ടി കുറിച്ചു.കുറിപ്പിനൊപ്പം കാലില്‍ ബാന്‍ഡേജിട്ട ചിത്രവും താരം പങ്കുവെച്ചിട്ടുണ്ട്. നടക്കാന്‍ കഴിയാത്തതിനാല്‍ വീല്‍ ചെയറിലിരുന്നാണ് ചിത്രം എടുത്തിരിക്കുന്നത്.