മകളെ പീഡിപ്പിച്ചെന്ന് സഹോദരീഭര്‍ത്താവിനെതിരേ പോക്‌സോകേസ്; പിന്നില്‍ സ്വത്തുതര്‍ക്കം, പ്രതിയെ വെറുതേവിട്ടു

ചങ്ങനാശ്ശേരി: സഹോദരങ്ങള്‍ക്ക് കൂട്ടവകാശത്തില്‍ ഉള്‍പ്പെട്ട വീട്ടില്‍നിന്ന് ഒഴിപ്പിക്കുന്നതിനായി സഹോദരീ ഭര്‍ത്താവിനെതിരേ പ്രായപൂര്‍ത്തിയാകാത്ത മകളെ മുന്‍നിര്‍ത്തി കെട്ടിച്ചമച്ച കേസില്‍ പ്രതിയെ കുറ്റക്കാരനല്ലെന്ന് കണ്ട് കോടതി വെറുതെ വിട്ടു. കുറിച്ചി സ്വദേശി ബാബു(65)നെയാണ് ചങ്ങനാശ്ശേരി സ്‌പെഷ്യല്‍ പോക്‌സോ കോടതി വെറുതെ വിട്ടത്.2019-ല്‍ ചിങ്ങവനം പോലീസ് രജിസ്റ്റര്‍ചെയ്ത കേസിലാണ് വിധി. പ്രായപൂര്‍ത്തിയാകാത്ത പരാതിക്കാരിയെ തുടര്‍ച്ചയായ രണ്ടുദിവസം ലൈംഗിക താത്പര്യത്തോടെ ശാരീരിക ഉപദ്രവങ്ങള്‍ക്കിരയാക്കി എന്നാരോപിച്ചാണ് പരാതിക്കാരിയുടെ പിതൃസഹോദരീഭര്‍ത്താവിനെതിരേ ചിങ്ങവനം പോലീസ് കേസ് രജിസ്റ്റര്‍ചെയ്തത്. ഒരുവീട്ടില്‍ രണ്ട് കുടുംബങ്ങളായി താമസിച്ചുവന്ന സഹോദരിയും സഹോദരനുമുള്‍പ്പെട്ട കുടുംബത്തിനുള്ളില്‍ രൂപപ്പെട്ട അവകാശ തര്‍ക്കമാണ് സഹോദരീഭര്‍ത്താവായ ബാബുവിനെ പ്രതി ചേര്‍ത്ത് പോക്‌സോ കേസ്സിന് വഴി തുറന്നത്. ആരോപണമുയര്‍ന്ന സമയത്ത് ബാബുവും കുടുംബവും വീട്ടില്‍നിന്ന് ഭീഷണിയെത്തുടര്‍ന്ന് ഒഴിഞ്ഞു പോയിരുന്നു.പ്രോസിക്യൂഷന്‍ ഭാഗത്തുനിന്ന് 30 സാക്ഷികളേയും പ്രതി ഭാഗത്തുനിന്ന് മൂന്ന് പേരേയും വിസ്തരിച്ചു. കുടിയൊഴിപ്പിക്കലിനെ മുന്‍നിര്‍ത്തിയുള്ള ആസൂത്രിത ആരോപണം എന്ന നിരീക്ഷണം അടിസ്ഥാനമാക്കിയാണ് സ്‌പെഷ്യല്‍ പോക്‌സോ കോടതി ജഡ്ജി ജയകൃഷ്ണന്‍ പ്രതിയെ വെറുതെ വിട്ട് ഉത്തരവായത്. പ്രതിയ്ക്കുവേണ്ടി അഡ്വ.പി. അനില്‍കുമാര്‍, ശ്രീജാ ബോസ്, അഖില്‍ ഉത്തമന്‍, അര്‍സില അസ്സീസ്, അര്‍ച്ചന സുകുമാര്‍, അഞ്ചു ജോസഫ് എന്നിവര്‍ ഹാജരായി.