ഇര്‍ഷാദ് കൊലപാതക കേസ്; രണ്ട് പേര്‍ കൂടി അറസ്റ്റില്‍

കോഴിക്കോട് സ്വര്‍ണക്കടത്ത് സംഘം തട്ടിക്കൊണ്ടുപോയ യുവാവ് കൊല്ലപ്പെട്ട സംഭവത്തില്‍ രണ്ടു പേര്‍ കൂടി അറസ്റ്റില്‍. വയനാട് മേപ്പാടി സ്വദേശികള്‍ ആയ മുബഷീര്‍, ഹിബാസ് എന്നിവര്‍ ആണ് പിടിയിലായത്. ഇര്‍ഷാദിനെ തട്ടിക്കൊണ്ടു പോയി ഒളിവില്‍ പാര്‍പ്പിച്ചവരാണ് ഇവര്‍. ഇതോടെ കേസില്‍ അറസ്റ്റില്‍ ആയവരുടെ എണ്ണം 9 ആയി. പന്തിരിക്കര ഇര്‍ഷാദ് കൊലപാതകക്കേസിലെ മൂന്ന് പ്രതികള്‍ കല്‍പ്പറ്റ സിജെഎം കോടതിയില്‍ കീഴടങ്ങിയിരുന്നു. പ്രതികളെ കേസ് നടക്കുന്ന അധികാര പരിധിയിലെ കോടതിയില്‍ ഹാജരാക്കാനും കോടതി ഉത്തരവിട്ടിരുന്നു. ഏതാനും ദിവസം മുന്‍പാണ് ഇര്‍ഷാദ് മരിച്ചെന്ന വിവരം പുറത്ത് വരുന്നത്. ആഴ്ചകള്‍ക്ക് മുന്‍പ് കൊയിലാണ്ടി നിന്നും കണ്ടെടുത്ത മൃതദേഹം ഇന്‍ഷാദിന്റേതാണെന്ന് പൊലീസ് കണ്ടെത്തിയിരുന്നു. കോഴിക്കോട് പെരുവണ്ണാമുഴിയില്‍ നിന്ന് തട്ടിക്കൊണ്ടു പോയ ഇര്‍ഷാദിനെ വിട്ട് കിട്ടാന്‍ കുടുംബം സ്വര്‍ണക്കടത്ത് സംഘത്തിന് പണം നല്‍കിയിരുന്നു. ഇര്‍ഷാദ് മരിച്ച വിവരം മറച്ചു വച്ചാണ് സ്വര്‍ണക്കടത്ത് സംഘം പണം വാങ്ങിയത്. ആദ്യം അന്‍പതിനായിരം രൂപയും പിന്നീട് പത്ത് ലക്ഷം രൂപയും കുടുംബം നല്‍കി. പണമിടപാടുമായി ബന്ധപെട്ട ശബ്ദരേയും ബാങ്ക് ഇടപാട് രേഖകളും 24ന് ലഭിച്ചു. പണം നല്‍കിയ ശേഷമാണ് ഇര്‍ഷാദ് മരിച്ചെന്ന വിവരം പൊലീസ് ഔദ്യോഗികമായി സ്ഥിരീകരിച്ചത്.