അനിയത്തിയെ രക്ഷിക്കാന്‍ കൊക്കര്‍ണിയില്‍ ചാടിയ പെണ്‍കുട്ടി മുങ്ങിമരിച്ചു

പുതുനഗരം: കൊക്കര്‍ണിയില്‍ (ആഴമുള്ള കുളം) വീണ അനിയത്തിയെ രക്ഷപ്പെടുത്താന്‍ ശ്രമിക്കുന്നതിനിടെ പ്ലസ്ടു വിദ്യാര്‍ഥിനിയായ ചേച്ചി മുങ്ങിമരിച്ചു. കരിപ്പോട് അടിച്ചിറ വിക്കാപ്പ് നടുവത്തുകളത്തില്‍ പരേതനായ ശിവദാസന്റെയും ശശിലേഖയുടെയും മകള്‍ ശിഖാദാസാണ് (16) മരിച്ചത്. ശനിയാഴ്ച ഉച്ചയ്ക്ക് 12.45ന് പെരുമാട്ടി വണ്ടിത്താവളം മേലെ എഴുത്താണിയിലെ സ്വകാര്യവ്യക്തിയുടെ കൊക്കര്‍ണിയിലാണ് സംഭവം. മേലെ എഴുത്താണിയിലെ കൂട്ടുകാരിയുടെ വീട്ടിലെത്തിയ ശിഖയും അനിയത്തി ശില്പയും കൂട്ടുകാരിക്കൊപ്പം സമീപത്തെ നെല്‍പ്പാടത്തെ വരമ്പിലൂടെ നടക്കുമ്പോള്‍ ശില്പയുടെ കാലില്‍ ചെളി പുരണ്ടു. ഇത് കഴുകാന്‍ അടുത്തുള്ള കൊക്കര്‍ണിയിലേക്ക് ഇറങ്ങിയ ശില്പ വഴുതിവീണു. മുങ്ങിത്താണ അനിയത്തിയെ രക്ഷിക്കാന്‍ ശിഖ കൊക്കര്‍ണിയിലേക്ക് ചാടി. ഇതിനിടെ കൊക്കര്‍ണിയിലെ പുല്ലില്‍ പിടിച്ചുതൂങ്ങി അനിയത്തി കരയ്ക്ക് കയറി. കൊക്കര്‍ണിയിലേക്ക് താഴ്ന്നുപോയ ശിഖയെ ശില്പയും കൂട്ടുകാരിയും ചേര്‍ന്ന് രക്ഷിക്കാന്‍ ശ്രമിച്ചെങ്കിലും ഫലമുണ്ടായില്ല. കുട്ടികളുടെ നിലവിളി കേട്ട് സമീപത്തെ ക്ലബ്ബിലുണ്ടായിരുന്ന യുവാക്കള്‍ ഓടിയെത്തി രക്ഷിക്കാന്‍ ശ്രമിച്ചെങ്കിലും ശിഖ അടിത്തട്ടിലേക്ക് താഴ്ന്നുപോയിരുന്നു. ചിറ്റൂര്‍ അഗ്‌നിരക്ഷാനിലയത്തില്‍നിന്ന് രണ്ട് യൂണിറ്റ് ജീവനക്കാരെത്തിയാണ് മൃതദേഹം പുറത്തെടുത്തത്. വടവന്നൂര്‍ വി.എം.എച്ച്.എസ്. സ്‌കൂളിലെ പ്ലസ് ടു വിദ്യാര്‍ഥിനിയാണ് ശിഖ. മുത്തശ്ശി ജാനകിക്കൊപ്പമാണ് ശിഖ താമസിച്ചിരുന്നത്. മൃതദേഹം ജില്ലാ ആശുപത്രി മോര്‍ച്ചറിയിലേക്ക് മാറ്റി. പോസ്റ്റുമോര്‍ട്ടത്തിനുശേഷം ഞായറാഴ്ച രാവിലെ 8.30-ന് ചിറ്റൂര്‍ വാതകശ്മശാനത്തില്‍ സംസ്‌കരിക്കും. കൊക്കര്‍ണിക്ക് 20 അടിയോളം ആഴമുണ്ടായിരുന്നതായി അഗ്‌നിരക്ഷാസേന ഉദ്യോഗസ്ഥര്‍ പറഞ്ഞു. സ്റ്റേഷന്‍ ഓഫീസര്‍ കെ. സത്യപ്രകാശന്‍, അസി. സ്റ്റേഷന്‍ ഓഫീസര്‍ പുഷ്പരാജന്‍, സീനിയര്‍ ഫയര്‍ ആന്‍ഡ് റെസ്‌ക്യൂ ഓഫീസര്‍ ബിജുമോന്‍ തുടങ്ങിയവര്‍ രക്ഷാപ്രവര്‍ത്തനത്തിന് നേതൃത്വം നല്‍കി.