എസ്എസ്എല്‍വി വിജയകരമായി വിക്ഷേപിച്ചു

ചെന്നൈ: ചെറിയ ഉപഗ്രഹങ്ങളെ ഭൂമിക്കടത്തുള്ള ഭ്രമണപഥങ്ങളില്‍ എത്തിക്കുന്നതിനായി ഐഎസ്ആര്‍ഒ രൂപകല്‍പന ചെയ്ത സ്‌മോള്‍ സാറ്റലൈറ്റ് ലോഞ്ച് വെഹിക്കിളിള്‍ (എസ്എസ്എല്‍വി) കുതിച്ചുയര്‍ന്നു. രാവിലെ 9.18ന് ആണു റോക്കറ്റ് ശ്രീഹരിക്കോട്ടയില്‍നിന്നു വിക്ഷേപിച്ചത്. എര്‍ത്ത് ഒബ്സര്‍വേഷന്‍ സാറ്റലൈറ്റ് (ഇഒഎസ്02), ആസാദിസാറ്റ് എന്നീ ഉപഗ്രഹങ്ങളെ വഹിച്ചുകൊണ്ടാണ് എസ്എസ്എല്‍വിയുടെ കുതിപ്പ്. സ്‌പേസ്‌കിഡ്‌സ് ഇന്ത്യ എന്ന സ്റ്റാര്‍ട്ടപ്പിന്റെ നേതൃത്വത്തില്‍ ഇന്ത്യയില്‍ ഗ്രാമീണമേഖലയില്‍ നിന്നുള്ള 750 വിദ്യാര്‍ഥിനികള്‍ വികസിപ്പിച്ചതാണ് ആസാദിസാറ്റ്. രാജ്യത്തിനകത്തും പുറത്തുമുള്ള ഉപയോക്താക്കള്‍ക്ക് ഭാവിയില്‍ എസ്എസ്എല്‍വി സേവനം ഉപയോഗിക്കാം. ചെറിയ ഉപഗ്രഹങ്ങള്‍ എസ്എസ്എല്‍വി റോക്കറ്റ് ഉപയോഗിച്ചു സൗകര്യപ്രദമായി താഴ്ന്ന ബഹിരാകാശ ഭ്രമണപഥത്തിലെത്തിക്കാമെന്നു ഡോ. എസ്. ഉണ്ണിക്കൃഷ്ണന്‍ നായര്‍ വിശദീകരിച്ചു. ചെലവും തയാറെടുപ്പിനുള്ള സമയവും കുറവാണെന്നത് എസ്എസ്എല്‍വിയുടെ സവിശേഷതയാണ്. വലിയ വിക്ഷേപണ വാഹനങ്ങള്‍ ഒരുക്കാന്‍ 40 60 ദിവസം വേണ്ടിവരുമ്പോള്‍ എസ് എസ്എല്‍വിക്കു 3 ദിവസം മതി. ഇന്ത്യ ബഹിരാകാശത്തേക്ക് ആളെ അയയ്ക്കുന്ന ഗഗന്‍യാന്‍ പദ്ധതിയില്‍ പങ്കെടുക്കുന്ന യാത്രികര്‍ മോസ്‌കോയിലെ അടിസ്ഥാനപരിശീലനം കഴിഞ്ഞശേഷം ബെംഗളൂരുവിലെ ഐഎസ്ആര്‍ഒ കേന്ദ്രത്തില്‍ തുടര്‍പരിശീലനം നടത്തുകയാണെന്നും അദ്ദേഹം അറിയിച്ചു. പിഎസ്എല്‍വിയുടെ മോചകന്‍ എസ്എസ്എല്‍വി റോക്കറ്റ് വരുന്നതോടെ ചെറിയ ഉപഗ്രഹങ്ങളുടെ വിക്ഷേപണച്ചുമതലയില്‍ നിന്ന് പി എസ്എല്‍വി ഒഴിവാകും. ഉപയോക്താക്കളില്‍ നിന്ന് ഓര്‍ഡര്‍ ലഭിച്ചാല്‍ ചുരുങ്ങിയ സമയത്തിനുള്ളില്‍ വിക്ഷേപണം നടത്താമെന്നത്ത് എസ് എസ്എല്‍വിയുടെ ഗുണമാണ്. വലിയ സാധ്യതയുള്ള ചെറുകിട ഉപഗ്രഹവിപണിയില്‍ ശക്തസാന്നിധ്യമാകാന്‍ ഇത് ഐഎസ് ആര്‍ഒയ്ക്ക് കരുത്തു നല്‍കും.