ട്രാക്കിലൂടെ നടന്ന 2 യുവതികള്‍ ട്രെയിനിന്റെ കാറ്റടിച്ച് തോട്ടില്‍ വീണു; ഒരാള്‍ക്ക് ഗുരുതര പരുക്ക്

തൃശൂര്‍: ചാലക്കുടിയില്‍ റെയില്‍വേ ട്രാക്കിലൂടെ നടന്ന രണ്ടു യുവതികള്‍ തോട്ടില്‍വീണു. ട്രെയിന്‍ വരുന്നത് കണ്ട് പാലത്തില്‍ മാറിനിന്നെങ്കിലും ട്രെയിനിന്റെ കാറ്റടിച്ച് തോട്ടില്‍ വീഴുകയായിരുന്നു. വി.ആര്‍.പുരം സ്വദേശിനികളായ ദേവീകൃഷ്ണ (28), ഫൗസിയ (35) എന്നിവരാണ് വീണത്. ഇരുവരും രാവിലെ ജോലിക്ക് പോകുന്നതിനിടെയാണ് സംഭവം. വി.ആര്‍.പുരത്ത് റോഡില്‍ വെള്ളമായതിനാലാണ് ട്രാക്കിലൂടെ നടന്നത്. ദേവീകൃഷ്ണയ്ക്ക് ഗുരുതരമായി പരുക്കേറ്റു. ചെളിയില്‍ താഴ്ന്നുപോയ ദേവീകൃഷ്ണയുടെ കാലില്‍ കമ്പി തുളച്ചുകയറി. വെള്ളത്തില്‍ ഒഴുകി പോയ ഫൗസിയയെ നാട്ടുകാര്‍ രക്ഷപ്പെടുത്തി. ഇരുവരെയും ചാലക്കുടിയിലെ ആശുപത്രിയില്‍ പ്രവേശിപ്പിച്ചു.