വെള്ളിമാടുകുന്നിലെ ബാലമന്ദിരത്തില്‍ വീണ്ടും സുരക്ഷാ വീഴ്ച; രണ്ട് പെണ്‍കുട്ടികള്‍ പുറത്ത് കടന്നു

കോഴിക്കോട്: വെള്ളിമാടുകുന്ന് ചില്‍ഡ്രന്‍സ് ഹോമില്‍ നിന്ന് വീണ്ടും കുട്ടികള്‍ പുറത്ത് കടന്നു. രണ്ട് പെണ്‍കുട്ടികളാണ് ചില്‍ഡ്രന്‍സ് ഹോമില്‍ നിന്ന് പുറത്ത് കടന്നത്. ഇന്ന് പുലര്‍ച്ചെയാണ് സംഭവം. പോക്‌സോ കേസുകളിലെ ഇരകളായ കുട്ടികളാണ് ഇവര്‍. മെഡിക്കല്‍ കോളേജ് പൊലീസ് അസിസ്റ്റന്റ് കമ്മീഷണറുടെ നേതൃത്വത്തില്‍ സംഭവത്തില്‍ അന്വേഷണം തുടങ്ങി. ഈ വര്‍ഷം ജനുവരി 26 ന് സമാനമായ നിലയില്‍ ഇതേ ചില്‍ഡ്രന്‍സ് ഹോമില്‍ നിന്ന് പെണ്‍കുട്ടികള്‍ പുറത്ത് കടന്നിരുന്നു. ആറ് പെണ്‍കുട്ടികളാണ് അന്ന് ബാലികാ മന്ദിരത്തില്‍ നിന്ന് പുറത്ത് കടന്നത്. ഈ സംഭവം വലിയ വിവാദമാവുകയും ചെയ്തു. അന്ന് നടത്തിയ അന്വേഷണത്തിന് ഒടുവില്‍ മന്ദിരത്തില്‍ നിന്ന് ഇറങ്ങിയ രണ്ട് കുട്ടികളെ ബംഗളൂരുവില്‍ നിന്നും നാലു പേരെ മലപ്പുറം എടക്കരയില്‍ നിന്നും കണ്ടെത്തിയിരുന്നു. ബാല മന്ദിരത്തിലെ സുരക്ഷ വീഴ്ചയെ തുടര്‍ന്ന് ബാലമന്ദിരത്തിലെ സൂപ്രണ്ട് ഉള്‍പ്പെടെ ഉള്ളവരെ ഈ സംഭവത്തിന്റെ പശ്ചാത്തലത്തില്‍ സ്ഥലം മാറ്റിയിരുന്നു. ബാല മന്ദിരത്തിലെ മോശം സാഹചര്യം കാരണമാണ് പുറത്തുകടക്കാന്‍ തീരുമാനിച്ചതിന് പിന്നിലെന്നാണ് അന്ന് പുറത്ത് കടന്ന ആറ് പെണ്‍കുട്ടികളും പൊലീസിന് നല്‍കിയ മൊഴി. കുട്ടികളുടെ എതിര്‍പ്പ് മറികടന്നാണ് ഇവരെ തിരികെ ബാലമന്ദിരത്തിലെത്തിച്ചത്. ഇവരില്‍ ഒരാള്‍ പിന്നീട് കൈ ഞരമ്പ് മുറിച്ച് ആത്മഹത്യക്ക് ശ്രമിക്കുകയും ചെയ്തിരുന്നു. ഈ സാഹചര്യത്തില്‍ ശിശു ക്ഷേമ സമിതിയും കുട്ടികളുടെ മൊഴി രേഖപ്പെടുത്തിയിരുന്നു. ബാല മന്ദിരത്തിലെ ജീവിത സാഹചര്യം മോശമാണെന്ന് നേരത്തെയും പരാതികളുയര്‍ന്നിരുന്നു. എന്നാല്‍ അധികൃതരുടെ ഭാഗത്ത് നിന്നും കാര്യമായ ഇടപെടലുണ്ടായിരുന്നില്ല. ഇതാണ് ഇപ്പോള്‍ വീണ്ടും കുട്ടികള്‍ പുറത്ത് കടക്കാന്‍ കാരണം എന്നാണ് വിവരം.