മൂവാറ്റുപുഴയില്‍ പാലത്തിന്റെ അപ്രോച്ച് റോഡില്‍ വന്‍ഗര്‍ത്തം; എംസി റോഡില്‍ വണ്‍വേ

മൂവാറ്റുപുഴ എംസി റോഡില്‍ കച്ചേരിത്താഴം പാലത്തിനു സമീപം വലിയ ഗര്‍ത്തം. ആശങ്ക സൃഷ്ടിച്ച് ഗര്‍ത്തം വലുതാകുന്നതിനെ തുടര്‍ന്ന് പാലത്തിലൂടെയുള്ള ഗതാഗതം നിരോധിച്ചു. ഇപ്പോള്‍ പഴയ പാലത്തിലൂടെയാണ് വാഹനങ്ങള്‍ കടത്തി വിടുന്നത്. ചൊവ്വാഴ്ച രാത്രി എട്ടരയോടെയാണ് ഇവിടെ കുഴി രൂപപ്പെട്ടത്. കച്ചേരിത്താഴം പാലത്തിനോട് ചേര്‍ന്ന് ഏകദേശം 10 മീറ്റര്‍ മാറിയാണ് ഗര്‍ത്തം രൂപപ്പെട്ടിരിക്കുന്നത്. ദിവസേന ആയിരക്കണകിനാളുകള്‍ സഞ്ചരിക്കുന്ന എംസി റോഡിനോട് ചേര്‍ന്നാണ് ഗര്‍ത്തം എന്നുള്ളത് അപകട സാധ്യത വര്‍ധിപ്പിക്കുന്നു. ഗര്‍ത്തം അനുനിമിഷം വലുതാകുന്നതിനെ തുടര്‍ന്നാണ് ഗതാഗതം നിയന്ത്രിച്ചത്. പൊതുമരാമത്ത് വിഭാഗം ഉദ്യോഗസ്ഥര്‍ സ്ഥലത്തെത്തി പരിശോധന ആരംഭിച്ചിട്ടുണ്ട്. നഗരത്തിലും എംസി റോഡിലും വന്‍ഗതാഗതക്കുരുക്കിനു സാധ്യത ഉള്ളതിനാല്‍ പൊലീസ് സംഘവും സ്ഥലത്തുണ്ട്. അപ്രോച്ച് റോഡിനടിയില്‍ മണ്ണ് ഒലിച്ചുപോയെന്ന സംശയമുള്ളതിനാല്‍ വിശദമായ പരിശോധന ഇന്ന് ഉണ്ടാകും. മഴക്കെടുതിയില്‍ എറണാകുളം ജില്ലയില്‍ ഏഴ് ദുരിതാശ്വാസ ക്യാംപ് കൂടി തുറന്നു.