നിയന്ത്രണം വിട്ട കാര്‍ ഇന്‍ഡിഗോ വിമാനത്തിനടുത്തേക്ക് പാഞ്ഞെത്തി,ഞെട്ടല്‍ വിഡിയോ

ന്യൂഡല്‍ഹി: വിമാനത്താവളത്തിനുള്ളില്‍ നിര്‍ത്തിയിട്ട ഇന്‍ഡിഗോ വിമാനത്തിനു സമീപത്തേക്ക് നിയന്ത്രണം വിട്ട കാര്‍ പാഞ്ഞുകയറി. ഡല്‍ഹിയിലെ ഇന്ദിര ഗാന്ധി രാജ്യാന്തര വിമാനത്താവളത്തിലാണ് സംഭവം. വിമാനത്തിനു സമീപത്തേക്ക് പാഞ്ഞെത്തിയ കാര്‍, വിമാനത്തിന്റെ മുന്‍വശത്തെ ടയറില്‍ ഇടിക്കാതെ രക്ഷപ്പെട്ടത് ഭാഗ്യം കൊണ്ടു മാത്രം. അപകടത്തിന്റെ വിഡിയോ ദൃശ്യങ്ങള്‍ പുറത്തുവന്നിട്ടുണ്ട്. വിമാനത്തിന് അടുത്തേക്ക് പാഞ്ഞെത്തിയ കാര്‍ മുന്‍ ടയറിനു സമീപം കിടക്കുന്നത് വിഡിയോയില്‍ കാണാം. ഡല്‍ഹിയില്‍നിന്ന് പട്നയിലേക്കു പോകാന്‍ തയാറെടുത്തുനിന്ന വിമാനമാണ് അപകടത്തില്‍നിന്ന് തലനാരിഴയ്ക്ക് രക്ഷപ്പെട്ടത്. ഗോ ഫസ്റ്റ് എയര്‍ലൈനിന്റെ ഉടമസ്ഥതയിലുള്ള സ്വിഫ്റ്റ് ഡിസയര്‍ കാറാണ് വിമാനത്തിനു തൊട്ടടുത്തെത്തി നിന്നത്. വിമാനം പിന്നീട് പട്‌നയിലേക്കു പറന്നു. സംഭവത്തില്‍ ഡയറക്ടര്‍ ജനറല്‍ ഓഫ് സിവില്‍ ഏവിയേഷന്‍ (ഡിജിസിഎ) അന്വേഷണം പ്രഖ്യാപിച്ചു. കാര്‍ ഡ്രൈവര്‍ക്ക് സംഭവിച്ച അബദ്ധം മാത്രമാണ് സംഭവമെന്നാണ് പ്രാഥമിക വിവരം. സംഭവം നടന്നതിനു പിന്നാലെ കാര്‍ ഡ്രൈവറെ മെഡിക്കല്‍ പരിശോധിയ്ക്ക് വിധേയനാക്കിയിരുന്നു. കാര്‍ ഡ്രൈവര്‍ മദ്യപിച്ചിരുന്നില്ലെന്നാണ് പരിശോധനയില്‍ കണ്ടെത്തിയത്. അമിത ജോലി കാരണം ഡ്രൈവര്‍ ക്ഷീണിതനായതാകാം ഇത്തരമൊരു അപകടത്തിലേക്കു നയിച്ചതെന്നാണ് അനുമാനം. വാഹനം നിയന്ത്രണം വിട്ട് വിമാനത്തിന് അടുത്തെത്തിയെങ്കിലും ടയറില്‍ ഇടിക്കും മുന്‍പേ ഡ്രൈവര്‍ക്ക് നിയന്ത്രിക്കാനായതാണ് അപകടമൊഴിവാക്കിയത്. ഇതോടെ വിമാനത്തിന് യാതൊരു കേടുപാടും സംഭവിച്ചില്ല. അപകടത്തില്‍ ആര്‍ക്കും പരുക്കുമില്ല.