വിനോദ സഞ്ചാരികള്‍ എന്ന വ്യാജേന ഹഷീഷ് കടത്ത്; യുവാക്കള്‍ പിടിയില്‍

പാലക്കാട്: വിനോദ സഞ്ചാരികള്‍ എന്ന വ്യാജേന 200 ഗ്രാം ഹഷീഷ് ഗുളികകള്‍ കടത്തിയ യുവാക്കള്‍ പാലക്കാട് ഒലവക്കോട് അറസ്റ്റില്‍. തൃശൂര്‍ സ്വദേശി ഷാജിര്‍, ചൂളൂര്‍ സ്വദേശി അനസ് എന്നിവരെയാണ് ആര്‍പിഎഫ് ക്രൈം ഇന്റലിജന്‍സും എക്‌സൈസ് ആന്റി നര്‍കോട്ടിക് വിഭാഗവും ചേര്‍ന്ന് പിടികൂടിയത്. കോളജ് വിദ്യാര്‍ഥികള്‍ക്കും പതിവ് ഇടപാടുകാരായ അതിഥി തൊഴിലാളികളെയും ലക്ഷ്യമിട്ട് കൊണ്ടുവന്നതാണ് ലഹരിയെന്നാണ് പ്രാഥമിക നിഗമനം ലഹരി കടത്തുകയെന്ന ലക്ഷ്യത്തോടെയാണ് ഇരുവരും കുളു മണാലിയില്‍ എത്തിയത്. യാത്രയ്ക്കുള്ള പണവും അതോടൊപ്പം നാട്ടിലെ ആഡംബര ജീവിതത്തിനുള്ള പണവും തരപ്പെടുത്തുകയായിരുന്നു ലക്ഷ്യം. ഇതിന്റെ ഭാഗമായാണ് ഹഷീഷ് ഗുളികകള്‍ വാങ്ങി റോഡ് മാര്‍ഗം ഡല്‍ഹിയിലെത്തിയത്. അവിടെനിന്ന് കേരള എക്സ്പ്രസില്‍ പാലക്കാട് റെയില്‍വേ സ്റ്റേഷനില്‍ ഇറങ്ങി. പിന്നീട് ബസ് മാര്‍ഗം തൃശൂരിലേക്ക് പോകാന്‍ തയാറെടുക്കുന്നതിനിടെയാണ് ആര്‍പിഎഫ് ക്രൈം ഇന്റലിജന്‍സ് വിഭാഗവും എക്‌സൈസും ചേര്‍ന്ന് ഇരുവരെയും പിടികൂടിയത്. തൃപ്രയാര്‍ കേന്ദ്രീകരിച്ചുള്ള ലഹരി വില്‍പന സംഘത്തിലെ പ്രധാന കണ്ണികളാണ് ഇവരെന്നാണ് വിവരം. സാധാരണ വിനോദ സഞ്ചാരികള്‍ ഉപയോഗിക്കുന്ന ബാഗിലാണ് രഹസ്യമായി തുണികള്‍ക്കിടയില്‍ ഗുളികകള്‍ സൂക്ഷിച്ചിരുന്നത്. കൗതുകത്തിന് ലഹരി ഉപയോഗം തുടങ്ങി പിന്നീട് ലഹരി വാങ്ങുന്നതിനുള്ള പണം കണ്ടെത്തുന്നതിനായി ഇത്തരത്തില്‍ യാത്ര നടത്തിയെന്നാണു നിഗമനം. നേരത്തെയും സംഘം ലഹരി കടത്തിയിട്ടുണ്ടോ എന്നത് പരിശോധിക്കുന്നുണ്ട്. യുവാക്കളുടെ മൊബൈല്‍ ഫോണിലേക്ക് വന്ന വിളികളുടെ വിശദാംശങ്ങളും പരിശോധിക്കും. അതോടൊപ്പം ഇരുവരുടെയും ഡയറിയില്‍ കണ്ടെത്തിയ രേഖകളും വിശദമായി പരിശോധിക്കുന്നതിനാണ് തീരുമാനം.