പ്രവീണ്‍ നെട്ടാരു കൊല്ലപ്പെട്ടത് ഉദയ്പുരിലെ തയ്യല്‍ക്കാരനെ പിന്തുണച്ചതിന്റെ പേരില്‍?

ബെംഗളൂരു: കര്‍ണാടകയിലെ ദക്ഷിണ കന്നഡ ജില്ലയില്‍ യുവമോര്‍ച്ച പ്രവര്‍ത്തകന്‍ പ്രവീണ്‍ നെട്ടാരുവിന്റെ കൊലപാതകത്തിന് ഉദയ്പുര്‍ സംഭവവുമായി ബന്ധമുണ്ടെന്ന് സൂചന. പ്രവാചക വിരുദ്ധ പരാമര്‍ശം നടത്തിയ ബിജെപി മുന്‍ വക്താവ് നൂപുര്‍ ശര്‍മയെ പിന്തുണച്ച് സമൂഹമാധ്യമത്തില്‍ കുറിപ്പിട്ട രാജസ്ഥാനിലെ ഉദയ്പുരിലെ തയ്യല്‍ക്കാരനായ കനയ്യലാലിനെ കൊലപ്പെടുത്തിയിരുന്നു. ജൂണ്‍ 29ന് ഫെയ്‌സ്ബുക്കില്‍ പ്രവീണ്‍ കനയ്യലാലിനെ പിന്തുണച്ച് കുറിപ്പ് ഇട്ടിരുന്നു. 'പാവപ്പെട്ട തയ്യല്‍ക്കാരനെ' തലയറുത്ത് കൊന്നതിനെക്കുറിച്ചും കൊലപാതകികള്‍ പ്രധാനമന്ത്രി നരേന്ദ്ര മോദിക്കെതിരെ നടത്തിയ ഭീഷണിയെക്കുറിച്ചും പ്രവീണ്‍ കുറിപ്പില്‍ പറഞ്ഞിരുന്നു. രാജസ്ഥാനില്‍ അധികാരത്തിലിരുന്ന കോണ്‍ഗ്രസിനെയും കുറിപ്പില്‍ വിമര്‍ശിച്ചിരുന്നു. അതേസമയം, ഉദയ്പുര്‍ സംഭവത്തിലേതുപോലെ വന്‍ പ്രതിഷേധങ്ങളും രാജ്യവ്യാപകമായി ഉയരുന്നുണ്ട്. ദക്ഷിണ കന്നഡ ജില്ലയില്‍ ബിജെപി പ്രവര്‍ത്തകര്‍ തെരുവില്‍ ഇറങ്ങി പ്രതിഷേധിക്കുകയാണ്. അതേസമയം, ഹീനമായ കുറ്റകൃത്യം നടത്തിയവരെ ഉടന്‍തന്നെ പിടികൂടുമെന്ന് കര്‍ണാടക മുഖ്യമന്ത്രി ബസവരാജ് ബൊമ്മൈ ഉറപ്പുനല്‍കി.