‘ബൈക്കിന്റെ റജിസ്ട്രേഷന്‍ നമ്പര്‍ ചുരണ്ടി മാറ്റാന്‍ ശ്രമം, പിടിയില്‍; കയ്യില്‍ മാരകായുധങ്ങള്‍’

തൃശൂര്‍: കൊരട്ടിയില്‍ കവര്‍ച്ച ആസൂത്രണം ചെയ്യുന്നതിനിടെ ആറംഗ സംഘം പൊലീസ് പിടിയില്‍. ഇവരില്‍നിന്ന് മാരകായുധങ്ങള്‍ കണ്ടെടുത്തു. അറസ്റ്റിലായ പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു. കാലടി മറ്റൂര്‍ സ്വദേശി ഗോകുല്‍, അങ്കമാലി സ്വദേശികളായ രഞ്ജിത്, ആഷിഖ്, കൊരട്ടി മങ്ങാട്ടുകര വിവേക്, പൂലാനി അതുല്‍, ചിറമേല്‍ ആന്റു എന്നിവരാണ് മോഷണം ആസൂത്രണം ചെയ്യുന്നതിനിടെ പിടയിലായത്. ചാലക്കുടി പുഴയുടെ തീരത്ത് കവര്‍ച്ച ആസൂത്രണം നടത്തി പിരിയുന്നതിനിടെ പട്രോളിങ് സംഘത്തിന്റെ കയ്യില്‍ അകപ്പെടുകയായിരുന്നു. ഇവര്‍ ഉപയോഗിക്കുന്ന ബൈക്കിന്റെ റജിസ്ര്‌ടേഷന്‍ നമ്പര്‍ ചുരണ്ടി മാറ്റാനുള്ള ശ്രമം കണ്ടാണ് പൊലീസ് ചോദ്യം ചെയ്ത് കസ്റ്റഡിയില്‍ എടുത്തത്. പരിശോധനയില്‍ ആയുധങ്ങള്‍ പിടിച്ചെടുത്തു. മോഷണത്തിന് ഉപയോഗിക്കാനുള്ള മുളകുപൊടിയും കണ്ടെടുത്തിട്ടുണ്ട്. പിടിയിലായവര്‍ക്കെതിരെ വിവിധ സ്റ്റേഷനുകളില്‍ കേസുകള്‍ നിലവിലുണ്ട്. ജില്ലയിലെ മറ്റു മോഷണകേസുകള്‍ക്ക് പിന്നില്‍ ഇവര്‍ക്കുള്ള പങ്കും പൊലീസ് അന്വേഷിക്കുന്നുണ്ട്.