20 ലക്ഷത്തിന്റെ ആഭരണവുമായി ഭര്‍ത്താവ് മുങ്ങി; തിരച്ചിലില്‍ കണ്ടെത്തിയത് 6 ഭാര്യമാരെ

ഹൈദരാബാദ്: പണവുമായി ഭര്‍ത്താവ് മുങ്ങിയെന്ന യുവതിയുടെ പരാതി അന്വേഷിച്ചെത്തിയ പൊലീസിന് ലഭിച്ചത് ഞെട്ടിപ്പിക്കുന്ന വിവരങ്ങള്‍. ആന്ധ്രപ്രദേശിലെ മംഗള്‍ഗിരിയിലാണ് സംഭവം. അഡപ ശിവശങ്കര ബാബു എന്നു പേരായ ഇയാളെ വിശാഖപട്ടണത്തു നിന്നാണ് പൊലീസ് അറസ്റ്റ് ചെയ്തത്. വഞ്ചനാകുറ്റം ചുമത്തിയാണ് അറസ്റ്റ്. പൊലീസ് തിരഞ്ഞപ്പോള്‍ ഇയാളുടെ ആറ് ഭാര്യമാരെയാണ് കണ്ടെത്തിയത്. മാട്രിമോണിയല്‍ സൈറ്റില്‍നിന്ന് 2021ലാണ് ഇയാളെ ഇഷ്ടപ്പെട്ടു വിവാഹം കഴിച്ചതെന്നു പരാതിക്കാരിയായ യുവതി പൊലീസിനോട് പറഞ്ഞു. 20 ലക്ഷം രൂപ വിലമതിപ്പുള്ള ആഭരണങ്ങളുമായാണ് ഇയാള്‍ കടന്നു കളഞ്ഞതെന്നും ഭാര്യ നല്‍കിയ പരാതിയില്‍ പറയുന്നുണ്ട്. പ്രതിയുടെ വിവാഹതട്ടിപ്പിന് കൂടുതല്‍ സ്ത്രീകള്‍ ഇരയായിട്ടുണ്ടോ എന്ന് പരിശോധിച്ചു വരികയാണെന്ന് പൊലീസ് അറിയിച്ചു.