ദേശീയപതാക രാത്രി താഴ്ത്തേണ്ട; പതാകാചട്ടം ഭേദഗതിചെയ്തു

ന്യൂഡല്‍ഹി: ദേശീയപതാക രാപകല്‍ വ്യത്യാസമില്ലാതെ ഉയര്‍ത്താന്‍ അനുമതിനല്‍കി കേന്ദ്രസര്‍ക്കാര്‍ പതാകാചട്ടം ഭേദഗതിചെയ്തു. സ്വാതന്ത്ര്യദിനാഘോഷത്തിന്റെ ഭാഗമായി അടുത്തമാസം 13 മുതല്‍ 15 വരെ വീടുകളില്‍ ദേശീയ പതാക ഉയര്‍ത്താന്‍ പ്രധാനമന്ത്രി നരേന്ദ്രമോദി ആഹ്വാനംചെയ്തിരുന്നു. വിവിധ മന്ത്രാലയങ്ങള്‍ക്കും വകുപ്പുകള്‍ക്കും കേന്ദ്ര ആഭ്യന്തര സെക്രട്ടറി അജയ് ഭല്ല ഇതുസംബന്ധിച്ച് കത്തയച്ചു. ** പതാക പുറത്തോ പൗരന്മാരുടെ വീട്ടിലോ ഉയര്‍ത്തുമ്പോള്‍ രാത്രിയും പകലും പ്രദര്‍ശിപ്പിക്കാം. (മുമ്പ് സൂര്യോദയംമുതല്‍ സൂര്യാസ്തമയംവരെയാണ് അനുവദിച്ചിരുന്നത്). ** പതാക കൈത്തറിയോ കൈയാല്‍ തുന്നിയതോ യന്ത്രനിര്‍മിതമോ ആകാം. കോട്ടണ്‍, പോളിയെസ്റ്റര്‍, പട്ട്, കമ്പിളി, ഖാദി തുണിത്തരവുമാകാം (മുമ്പ് യന്ത്രനിര്‍മിതവും പോളിയെസ്റ്റര്‍ കൊണ്ടുള്ളതുമായ പതാകകള്‍ക്ക് അനുമതിയില്ലായിരുന്നു.)