പ്രധാനമന്ത്രി ഉദ്ഘാടനം ചെയ്തിട്ട് 4 ദിവസം; യുപിയിലെ എക്‌സ്പ്രസ്‌വേ തകര്‍ന്നു

പ്രധാനമന്ത്രി നരേന്ദ്രമോദി ഉദ്ഘാടനം ചെയ്ത യുപിയിലെ എക്‌സ്പ്രസ് വേ തകര്‍ന്നു. ഉദ്ഘാടനം ചെയ്ത് വെറും 4 ദിവസങ്ങള്‍ക്കു ശേഷമാണ് ബുന്ദേല്‍ഖണ്ഡ് എക്സ്പ്രസ് വേയുടെ വിവിധ ഭാഗങ്ങള്‍ മഴയില്‍ തകര്‍ന്നത്. തകര്‍ന്ന റോഡിന്റെ വിഡിയോ സമൂഹമാധ്യമങ്ങളില്‍ പ്രചരിക്കുന്നുണ്ട്. ജൂലായ് 16നാണ് ഇറ്റാവേയിലെ കുദ്രേലിനെ ചിത്രകൂടിലെ ഭരത് കൂപ്പുമായി ബന്ധിപ്പിക്കുന്ന എക്‌സ്പ്രസ് വേ പ്രധാനമന്ത്രി നാടിനു സമര്‍പ്പിച്ചത്. ഏഴ് ജില്ലകളിലൂടെ കടന്നുപോകുന്ന എക്‌സ്പ്രസ് വേയ്ക്ക് 8000 കോടി രൂപയാണ് ചെലവായത്. എന്നാല്‍, ദിവസങ്ങള്‍ക്കുള്ളില്‍ ഇത് തകര്‍ന്നു. എക്‌സ്പ്രസ് വേയുടെ വിവിധ ഇടങ്ങളില്‍ ടാര്‍ ഒലിച്ചുപോയി. ഇവിടങ്ങളില്‍ കുഴികള്‍ രൂപപ്പെട്ടതോടെ വാഹനാപകടങ്ങളും ഉണ്ടായി. കഴിഞ്ഞ രാത്രിയില്‍ രണ്ടു കാറുകളും ഒരു ഇരുചക്രവാഹനവും ഒവിടെ അപകടത്തില്‍ പെട്ടു. ചിരിയ, അജിത്ത്മല്‍ എന്നിവിടങ്ങളിലാണ് പ്രധാനമായും റോഡ് തകര്‍ന്നത്. റോഡിന്റെ അറ്റകുറ്റപ്പണികള്‍ ആരംഭിച്ചതായി അധികൃതര്‍ പറയുന്നു.