കെജിഎഫ് സിനിമ അനുകരിച്ച് ഭാര്യയെ മര്‍ദിച്ചു; ‘ഗ്യാങ്’ ആയെത്തി പൊലീസിന്റെ അറസ്റ്റ്

തൊടുപുഴ: മദ്യപിച്ച ശേഷം 'കെജിഎഫ്' സിനിമയിലെ 'റോക്കി ഭായ്' കഥാപാത്രമായി മാറി ഭാര്യയെ 'അധീര' കഥാപാത്രമായി സങ്കല്‍പിച്ച് മര്‍ദിച്ച യുവാവ് അറസ്റ്റില്‍. ഇടുക്കി അണക്കര പുല്ലുവേല്‍ സ്വദേശി ജിഷ്ണു ദാസിനെ (27) ആണ് വണ്ടന്മേട് പൊലീസ് അറസ്റ്റ് ചെയ്തത്. ഭാര്യയെ കയ്യില്‍ ധരിച്ചിരുന്ന വലിയ മോതിരം ഉപയോഗിച്ചു മുഖത്ത് ഉള്‍പ്പെടെ ഇടിച്ചു പരുക്കേല്‍പ്പിച്ചു. കഴുത്തിനു കുത്തിപ്പിടിച്ച് ശ്വാസം മുട്ടിക്കുകയും ചെയ്തു. വിവരമറിഞ്ഞ് എത്തിയ ഭാര്യാ പിതാവിന്റെ മുന്‍പില്‍ വച്ചും ക്രൂരമായി മര്‍ദിച്ചു. തുടര്‍ന്ന് ഇവര്‍ പൊലീസില്‍ പരാതി നല്‍കുകയായിരുന്നു. പരാതി ലഭിച്ചതിനു പിന്നാലെ 'ഗ്യാങ്' ആയി എത്തിയ വണ്ടന്‍മേട് പൊലീസ് 'മോണ്‍സ്റ്റര്‍' ആയ ജിഷ്ണുദാസിനെ പൊക്കിയെടുത്ത് ജീപ്പിലിട്ടു. വധശ്രമം ഉള്‍പ്പെടെയുള്ള വകുപ്പുകള്‍ ചുമത്തി കേസെടുത്തു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു. ജെസിബി ഡ്രൈവര്‍ ആണ് ജിഷ്ണു ദാസ്.