അമല്‍ പൊലീസിനെ സഹപാഠികള്‍ ആദരിച്ചു

പുത്തന്‍കുരിശ്: മാലിന്യത്തില്‍ കണ്ടെത്തിയ ദേശീയ പതാകയെ സല്യൂട്ട് ചെയ്ത പൊലീസുകാരനെ സഹപാഠികളും സ്‌കൂളും ആദരിച്ചു. കഴിഞ്ഞ ദിവസമാണ് ഇരുമ്പനത്ത് മാലിന്യകൂമ്പാരത്തില്‍ ദേശീയ പതാകയും കോസ്റ്റ് ഗാര്‍ഡ് പതാകയും കണ്ടെത്തിയിരുന്നത്. ഇതിന്റെ വിവരം അറിയിച്ചതിനെ തുടര്‍ന്ന് ഇരുമ്പനത്തെ പൊലീസ് സ്റ്റേഷനില്‍ നിന്ന് എത്തിയ പൊലീസ് സംഘത്തില്‍ ഉള്‍പ്പെട്ടിരുന്ന ടി.കെ.അമല്‍ എന്ന സിവില്‍ പൊലീസ് ഓഫീസര്‍ പതാക കണ്ടയുടന്‍ സല്യൂട്ട് ചെയ്യുകയും പതാകകള്‍ ഒന്നൊന്നായി മടക്കി എടുത്ത് ആദരവോടെ ജീപ്പില്‍ കൊണ്ടുപോകുകയും ചെയ്തിരുന്നു. ഇതിന്റെ ചിത്രങ്ങള്‍ സോഷ്യല്‍ മീഡിയായില്‍ വലിയ വൈറല്‍ ആയിരുന്നു. ഇതിനെ തുടര്‍ന്നാണ് പുത്തന്‍ കുരിശ് എം.എംജി.എം.എച്ച്.എസ് ലെ 93 ബാച്ച് എസ്എസ്എല്‍സി സഹപാഠികള്‍ അമലിനെ ആദരിക്കാന്‍ തീരുമാനിച്ചത്. ഇന്നലെ സ്‌കൂള്‍ ഓഡിറ്റോറിയത്തില്‍ നടന്ന ചടങ്ങുകള്‍ക്ക് ഹെഡമാസ്റ്റര്‍ അജി നാരായണന്‍ നേതൃത്വം നല്‍കി. സുഹൃത്തിനെ ആദരിക്കല്‍ പത്തിലധികം സഹപാഠികള്‍ എത്തിയിരുന്നു. അമലിന് മൊമ്മന്റോ നല്‍കിയാണ് ആദരിച്ചത്.