കേരള ക്രിക്കറ്റ് അസോസിയേഷനിലെ പീഡന പരാതി; ബാലാവകാശ കമ്മീഷന്‍ സ്വമേധയാ കേസെടുത്തു

കേരള ക്രിക്കറ്റ് അസോസിയേഷനിലെ പീഡന പരാതിയില്‍ ബാലാവകാശ കമ്മീഷന്‍ സ്വമേധയാ കേസെടുത്തു. കായികവകുപ്പിനോടും കന്റോണ്മെന്റ് പൊലീസിനോടും റിപ്പോര്‍ട്ട് തേടി. പരാതിക്കാരിയായ കുട്ടിയ്‌ക്കൊപ്പം മറ്റ് കുട്ടികള്‍ക്കും കൗണ്‍സില്‍ നല്‍കും. മറ്റു കുട്ടികള്‍ക്കും ദുരനുഭവമുണ്ടായിട്ടുണ്ടെന്ന് പരാതിക്കാരിയുടെ പിതാവ് നേരത്തെ വെളിപ്പെടുത്തിയിരുന്നു. ഗൗരവമുള്ള പരാതിയെന്ന് ബാലാവകാശ കമ്മീഷന്‍ ചെയര്‍മാന്‍ കെവി മനോജ് കുമാര്‍ 24നോട് പറഞ്ഞു. കായിക പരിശീലനത്തിനിടെയുണ്ടാവുന്ന ലൈംഗികാതിക്രമങ്ങള്‍ തടയാന്‍ മോണിട്ടറിംഗ് സംവിധാനത്തിന് ശുപാര്‍ശ ചെയ്യുമെന്നും കമ്മീഷന്‍ അറിയിച്ചു. പരാതിയില്‍ പൊലീസ് അന്വേഷണം പുരോഗമിക്കുകയാണ്. തിരുവനന്തപുരം ജില്ലാ വനിതാ അണ്ടര്‍ 19 പരിശീലകന്‍ മനു എം ശ്രീഹരിയ്‌ക്കെതിരെയാണ് പരാതി. പരിശീലനത്തിനെത്തിയ തമിഴ്‌നാട് സ്വദേശിനിയായ 12 വയസുകാരിയെയാണ് പീഡിപ്പിക്കാന്‍ ശ്രമിച്ചത്. ഇയാളെപ്പറ്റിയുള്ള വിവരശേഖരണം പൊലീസ് പൂര്‍ത്തിയാക്കിയിട്ടുണ്ട്. ബാലാവകാശ കമ്മീഷന്‍ പൊലീസിനോട് റിപ്പോര്‍ട്ട് തേടിയിട്ടുണ്ട്. കുട്ടിയെ ലൈംഗികമായി ആക്രമിക്കുകയും, മാനസികമായി പീഡിപ്പിക്കുകയും ചെയ്തു. സ്വാധീനം ഉപയോഗിച്ച് ഒത്തുതീര്‍പ്പിന് ശ്രമിച്ചു. പല പെണ്‍കുട്ടികള്‍ക്കും പരാതിയുണ്ടെന്നും, നാണക്കേട് ഭയന്ന് പുറത്ത് പറയാത്തതാണെന്നും പിതാവ് പറഞ്ഞു.