ഷിജുവിന്റെ ആത്മഹത്യയ്ക്കു പിന്നില്‍ ബ്ലേഡ് മാഫിയ; കടയില്‍ എത്തി കയ്യേറ്റം ചെയ്തു: കുടുംബം

വയനാട് മേപ്പാടിയിലെ ബേക്കറി ഉടമയുടെ ആത്മഹത്യയ്ക്ക് പിന്നില്‍ ബ്ലേഡ് മാഫിയയാണെന്നു കുടുംബം. ലോക്ഡൗണിലുണ്ടായ കടബാധ്യത തീര്‍ക്കാന്‍ വാങ്ങിയ പണത്തിന്റെ തിരിച്ചടവു മുടങ്ങിയതോടെ പലിശക്കാര്‍ ഷിജുവിനെ നിരന്തരം ഭീഷണിപ്പെടുത്തിയിരുന്നുവെന്നു ഭാര്യ രമ്യ പറഞ്ഞു. ഷിജു ആത്മഹത്യ ചെയ്യുന്നതിനു ദിവസങ്ങള്‍ക്ക് മുന്‍പ് പണം നല്‍കിയവരില്‍ ഒരാള്‍ കടയില്‍ കയറി ആക്രമിച്ചെന്നു ദൃശ്യങ്ങള്‍ സഹിതം കുടുംബം പൊലീസില്‍ പരാതി നല്‍കി. ജൂലൈ 12നാണ് മേപ്പാടിയിലെ കെഎസ് ബേക്കറി ഉടമയായ ഷിജു കടയ്ക്കുള്ളില്‍ തൂങ്ങിമരിച്ചത്. കടബാധ്യതയാണ് ഷിജുവിന്റെ മരണത്തിനു കാരണമെന്നായിരുന്നു നിഗമനം. എന്നാല്‍ ബ്ലേഡ് മാഫിയയുടെ നിരന്തരമായ വേട്ടയാടലാണ് ഷിജുവിന്റെ ജീവനെടുത്തതെന്നാണു കുടുംബത്തിന്റെ പരാതി. ലക്ഷങ്ങളുടെ കടബാധ്യത ഉണ്ടായിരുന്ന ഷിജു ലോക്ഡൗണില്‍ നഷ്ടം നേരിട്ടതോടെ കൊള്ളപ്പലിശയ്ക്ക് പലിശക്കാരില്‍ നിന്ന് പണം വാങ്ങിയിരുന്നു. തിരിച്ചടവ് മുടങ്ങിയതോടെ വീട്ടിലും കടയിലും എത്തി പണമിടപാടുകാര്‍ ഷിജുവിനെ ഭീഷണിപ്പെടുത്തിയെന്നു ഭാര്യ രമ്യ പറഞ്ഞു. ഷിജു മരിക്കുന്നതിന് ഒരാഴ്ച മുന്‍പ് പണം പലിശയ്ക്ക് നല്‍കിയിരുന്ന സമീപത്തെ സ്റ്റുഡിയോ ഉടമ ബേക്കറിയില്‍ എത്തി ബഹളമുണ്ടാക്കിയെന്നും കയ്യേറ്റം ചെയ്‌തെന്നും കുടുംബം പറയുന്നു. ദൃശ്യങ്ങള്‍ സഹിതം മേപ്പാടി പൊലീസിന് കുടുംബം പരാതി നല്‍കി. ഷിജുവിന്റെ മരണത്തില്‍ വിശദമായ അന്വേഷണം ആവശ്യപ്പെട്ട് സിപിഎമ്മും ഡവൈഎഫ്‌ഐയും രംഗത്തെത്തി.