ചലച്ചിത്രമേളകള്‍ പ്രതിഷേധത്തിനുള്ള ഇടം കൂടിയാണ്; കുഞ്ഞിലയ്ക്ക് പിന്തുണയുമായി വിധു വിന്‍സെന്റ്

വനിത ചലച്ചിത്രമേളയില്‍ നിന്ന് കുഞ്ഞിലയുടെ സിനിമ തഴഞ്ഞതില്‍ പ്രതിഷേധം ശക്തമാകുന്നു. ഫെസ്റ്റിവലില്‍ നിന്ന് സിനിമ പിന്‍വലിച്ചത് പ്രതിഷേധത്തിന്റെ ഭാഗമായെന്ന് വിധു വിന്‍സെന്റ് പറഞ്ഞു. എന്തിനാണ് സിനിമ ഒഴിവാക്കിയത് എന്ന് കുഞ്ഞില മസിലമണിയോട് പറഞ്ഞിട്ടില്ല. കുഞ്ഞിലയുടെ ചോദ്യങ്ങള്‍ പ്രസക്തമാണ്. ഫെസ്റ്റിവല്‍ മേളകള്‍ പ്രതിഷേധത്തിനുള്ള ഇടം കൂടിയാണ്. അവര്‍ക്കൊപ്പം നില്‍ക്കേണ്ടതുണ്ട് എന്നാണ് താന്‍ കരുതുന്നതെന്ന് വിധു വിന്‍സെന്റ് പ്രതികരിച്ചു. കുഞ്ഞിലയുടെ സിനിമ തഴഞ്ഞതില്‍ പ്രതിഷേധിച്ച് വനിത ചലച്ചിത്രമേളയില്‍ നിന്ന് വിധു വിന്‍സെന്റ് സിനിമ പിന്‍വലിച്ചിരുന്നു. മേളയിലെ നാല് മലയാള ചിത്രങ്ങളില്‍ ഒന്നായിരുന്നു വിധുവിന്റെ വൈറല്‍ സെബി. കുഞ്ഞിലയുടെ സിനിമ തഴഞ്ഞതില്‍ അക്കാദമി വാദം തള്ളുകയാണ് വിധു. കോഴിക്കോട് നടക്കുന്ന അന്താരാഷ്ട്ര വനിതാ ചലച്ചിത്ര മേളയുടെ ഉദ്ഘാടന വേദിയില്‍ പ്രതിഷേധിച്ച യുവസംവിധായക കുഞ്ഞിലയെ പൊലീസ് കസ്റ്റഡിയിലെടുത്തിരുന്നു. അസംഘടിതര്‍ എന്ന തന്റെ ചലച്ചിത്രം മേളയില്‍ നിന്നും ബോധപൂര്‍വ്വം ഒഴിവാക്കി എന്ന് പരാതിയുമായാണ് കുഞ്ഞില പ്രതിഷേധിച്ചത്. സര്‍ക്കാരിനേയും മുഖ്യമന്ത്രി പിണറായി വിജയനേയും വിമര്‍ശിച്ചും കെകെ രമ എംഎല്‍എയെ പിന്തുണച്ചും കുഞ്ഞില മുദ്രാവാക്യം മുഴക്കി. ഒടുവില്‍ നാല് വനിതാ പൊലീസുകാര്‍ ചേര്‍ന്ന് കുഞ്ഞിലയെ വേദിയില്‍ നിന്നിറക്കി കസ്റ്റഡിയിലെടുക്കുകയായിരുന്നു.