കാറും ബൈക്കും കൂട്ടിയിടിച്ച് ദമ്പതികള്‍ മരിച്ചു; സുമി മടങ്ങിയത് വിവരങ്ങള്‍ പൊലീസുകാരനോട് പറഞ്ഞശേഷം

കുമരകം: കോട്ടയം - കുമരകം റോഡില്‍ കാര്‍ നിയന്ത്രണം വിട്ടു ബൈക്കിലിടിച്ച് ദമ്പതികള്‍ മരിച്ചു. ഇന്നലെ വൈകിട്ട് 4.50ന് കൈപ്പുഴമുട്ട് പാലത്തിനും ചീപ്പുങ്കല്‍ പാലത്തിനും ഇടയിലാണ് അപകടം. കുടവെച്ചൂര്‍ കിടങ്ങലശേരി ജെഫിന്‍ കെ.പോള്‍ (36), ഭാര്യ സുമി രാജു (32) എന്നിവരാണു മരിച്ചത്. ബൈക്കില്‍ ദമ്പതികള്‍ക്കൊപ്പമുണ്ടായിരുന്ന മൂത്ത മകന്‍ ആല്‍ഫിന്‍ (4) വലതു കാല്‍ ഒടിഞ്ഞ് കോട്ടയം മെഡിക്കല്‍ കോളജില്‍ ചികിത്സയിലാണ്. മകള്‍ ആല്‍ഫിയയ്ക്ക് (ഒരു വയസ്സ്) പരുക്കില്ല. കുമരകം ഭാഗത്തുനിന്നു വന്ന ബൈക്കില്‍ കൈപ്പുഴമുട്ട് പാലം കടന്നുവന്ന കാര്‍ ഇടിക്കുകയായിരുന്നു. ജെഫിനും സുമിയും മക്കളും റോഡിലേക്കു തെറിച്ചു വീണു. കുമരകം പൊലീസെത്തി മെഡിക്കല്‍ കോളജില്‍ എത്തിച്ചെങ്കിലും രാത്രിയോടെ ജെഫിനും സുമിയും മരിച്ചു. ജെഫിന്‍ ഒരു വര്‍ഷമായി മല്ലപ്പള്ളിയിലെ സുമിയുടെ വീട്ടിലാണു താമസം. ജെഫിന്റെ സഹോദരന്റെ വിവാഹവുമായി ബന്ധപ്പെട്ടു കുടുംബവീട്ടിലെ ചടങ്ങില്‍ പങ്കെടുക്കുന്നതിനാണു വെച്ചൂരിലേക്ക് വന്നത്. കാറില്‍ ഡ്രൈവര്‍ മാത്രമേയുണ്ടായിരുന്നുള്ളൂ. ഡ്രൈവറെ ഗാന്ധിനഗര്‍ പൊലീസ് കസ്റ്റഡിയില്‍ എടുത്തു. പാതിവഴിയില്‍ മടക്കം വീട്ടിലെ ആഘോഷത്തിലേക്കുള്ള യാത്രയുടെ പാതിവഴിയിലാണ് ജെഫിനും സുമിയും ജീവിതത്തില്‍ നിന്നു മടങ്ങുന്നത്. നെബു-പൊന്നമ്മ ദമ്പതികളുടെ മകനായ ജെഫിന്‍ തന്റെ ഏക സഹോദരന്‍ സ്റ്റെഫിന്റെ വിവാഹം സംബന്ധിച്ച ചടങ്ങുകള്‍ക്കു വേണ്ടിയാണ് മല്ലപ്പള്ളിയില്‍ നിന്നു കുടുംബവീട്ടിലേക്കു പുറപ്പെട്ടത്. എന്നാല്‍ എതിരെ വന്ന കാര്‍ ഇവരുടെ ബൈക്ക് ഇടിച്ചു തെറിപ്പിച്ചു. മാതാപിതാക്കളുടെ സ്‌നേഹക്കരുതല്‍ നാലു വയസ്സുകാരന്‍ ആല്‍ഫിനും ഒരു വയസ്സുകാരി ആല്‍ഫിയയ്ക്കും ഇല്ലാതായി. അപകടത്തില്‍ നിന്നു പരുക്കില്ലാതെ രക്ഷപ്പെട്ട ആല്‍ഫിയ എന്താണു സംഭവിച്ചത് എന്നറിയാതെ ബന്ധുക്കള്‍ക്കൊപ്പമാണ്. സുമി മടങ്ങിയത് വിവരങ്ങള്‍ പൊലീസുകാരനോട് പറഞ്ഞശേഷം മരണത്തിനു കീഴടങ്ങും മുന്‍പ് സുമി പേരും വിവരവും പൊലീസിനെ അറിയിച്ചു. മെഡിക്കല്‍ കോളജ് ആശുപത്രിയില്‍ എത്തിച്ച ഉടന്‍ എയ്ഡ് പോസ്റ്റിലെ പൊലീസ് ഉദ്യോഗസ്ഥന്‍ വി.എസ്.മഹേഷാണ് ഇവരുടെ വിവരം പറയാനാകുമോ എന്നു നോക്കിയത്. ജെഫിന്‍ കഠിനമായ വേദന കൊണ്ടു പുളയുന്ന അവസ്ഥയിലായിരുന്നെന്നു മഹേഷ് പറഞ്ഞു. ഉടനെ വെന്റിലേറ്ററിലേക്ക് മാറ്റി. സുമിയാണ് എല്ലാവരുടെയും പേരു പറഞ്ഞത്. പിന്നീടു സുമിയെയും വെന്റിലേറ്ററിലേക്കു മാറ്റി. ദമ്പതികളുടെ തുടയെല്ല് ഒടിഞ്ഞുനുറുങ്ങിയ നിലയിലായിരുന്നു. ആശുപത്രിയില്‍ എത്തി ഒരുമണിക്കൂറിനു ശേഷം മരണം സ്ഥിരീകരിച്ചതായി അറിഞ്ഞെന്നും മഹേഷ് പറഞ്ഞു.